Lima ka armado nga aksyon ang ginlunsar sang mga yunit sang Bagong Hukbong Bayan (BHB) sa isla sang Negros kag Samar sang nagligad nga mga semana. Lakip sa mga ini ang pagtarget sang mga aset paniktik sang militar kag naga-operasyon nga mga pulis.

Sa Negros Occidental, napatay si Police Senior Master Sergeant Rommel Aguilar sang nagpalukpanay ang mga pulis sa isa ka tim sang BHB-Northern Negros (Roselyn Jean Pelle Command). Nakumpiskar sa iya ang isa ka 9mm nga pistola kag mga bala. Nasugata sang BHB ang grupo sang mga pulis sa Purok 5, Barangay Lagaan sa Calatrava sadtong Disyembre 7. Nagapaatras sadto ang mga Pulang hangaway halin sa aksyon militar batuk kay Mando Ugdiman, isa ka aset paniktik sang militar, sa Sityo Tagda, Barangay Dolis. Nakumpiskar kay Ugdiman ang isa ka .45 pistola, mga bala kag iban pa nga gamit sa inaway.

Sadtong Disyembre 13, patay ang aset paniktik nga si Amay Jimenez sa Sityo Makilo, Barangay Camansi, Kabankalan City sa operasyon sang BHB-Southwest Negros (Armando Sumayang Jr Command). Imbolbado si Jimenez sa pagtudlo sa lokasyon kag pagplano sa pagpatay sadtong Nobyembre 2022 sa utod niya nga lider mangunguma nga si Joseph Jimenez kag konsultant pangkalinong sang National Democratic Front of the Philippines nga si Ericson Acosta. Isa pa ka aset paniktik ang ginsilutan sa Sipalay City sadtong Disyembre 4.

Dalayawon nga depensa

Sa Samar, duha ka soldado sang Intelligence Service of the AFP (ISAFP) kag Military Intelligence Batallion (MIB) sa idalum sang 8th ID ang napatay sa armadong engkwentro sa BHB-Western Samar (Arnulfo Ortiz Command) sa Barangay Babaclayon, San Jose de Buan. Natabo ang inaway ala-1:32 sang kaagahon sadtong Disyembre 3.

Suno sa report sang BHB, duha ka hangaway sini ang yara sa komunidad para konsultahon ang masa nga nahalitan sang militarisasyon sang mga soldado. Indi magnubo sa 20 ka tropang militar ang tatlo ka adlaw na nga naga-operasyon sa amo nga komunidad sang adlaw nga ini.

Ginpalibutan sang mga operatibang paniktik sang militar ang balay nga ila gina-tineran kag pilit sila nga ginapasungka. Sa atubang sini, ginseguro sang mga Pulang hangaway ang kaluwasan sang mga sibilyan, kag luwas nga ginpaguwa sa balay ang bug-os nga pamilya. Ginpalukpan sang isa ka Pulang hangaway ang mga soldado nga ila ginkakibot. Sa mismo atubang sang mga kaaway naghapa ang Pulang hangaway samtang nagapalupok sang iya dala nga pusil. Agud makapalayo, naglumpat ang duha ka Pulang hangaway pa-guwa sa balay samtang ginapalukpan sang kaaway. Napilasan ang isa sa mga hangaway.