Lima nga armado nga aksyon an iginlansar han mga yunit han Bagong Hukbong Bayan (BHB) ha isla han Negros ngan Samar ha naglabay nga mga semana. Kalakip hini an pagtarget ha mga aset paniktik ngan nag-ooperasyon nga mga pulis.

Ha Negros Occidental, napatay hi Police Senior Master Sergeant Rommel Aguilar han makigpusilay an mga pulis ha usa nga tim han BHB-Northern Negros (Roselyn Jean Pelle Command). Nakumpiska ha iya an usa nga 9mm pistola ngan mga bala. Nakahitapo han BHB an grupo han mga pulis ha Purok 5, Barangay Lagaan ha Calatrava hadton Disyembre 7. Paatras hadto an mga Pula nga mangaraway tikang ha aksyon militar kontra kan Mando Ugdiman, usa nga aset paniktik han militar, ha Sityo Tagda, Barangay Dolis. Nakumpiska kan Ugdiman an usa nga .45 nga pistola, mga bala ngan iba pa nga higamit pan-gerra.

Hadton Disyembre 13, patay an aset paniktik nga hi Amay Jimenez ha Sityo Makilo, Barangay Camansi, Kabankalan City ha operasyon han BHB-Southwest Negros (Armado Sumayang Jr Command). Dabi hi Jimenez ha pagtudlok han lokasyon ngan pagplano ha pagpatay hadton Nobyembre 2022 ha bugto niya nga lider parag-uma nga hi Joseph Jimenez ngan konsultant pankamurayawan han National Democratic Front of the Philippines nga hi Ericson Acosta. Usa pa nga aset paniktik an ginsirutan ha Sipalay City hadton Disyembre 4.

Abtik nga pagdepensa

Ha Samar, duha nga sundalo han Intelligence Service of the AFP (ISAFP) ngan Military Intelligence Batallion (MIB) ha ilarum han 8th ID an napatay ha armado nga engkwentro ha BHB-Westerm Samar (Arnulfo Ortiz Command) ha Barangay Babaclayon, San Jose de Buan. Nahitabo an agway ala-1:32 han kaagahon hadton Disyembre 3. Sigon ha report han BHB, duha nga mangaraway hini an aada ha komunidad agud konsultahon an masa nga ginlalasurbo han militarisasyon han mga sundalo. Diri mamenos ha 20 nga tropa han militar an tulo kaadlaw na nga nag-ooperasyon ha nasering nga komunidad hiton nga adlaw.

Ginpalibutan han mga operatiba nga paniktik han militar an balay nga ira gin-ukyan ngan pirit hira nga ginpapasurender. Atubangan hini, ginseguro han mga Pula nga mangaraway an katalwasan han mga sibilyan, ngan talwas nga ginpagawas han balay an bug-os nga pamilya. Ginpabuthan han usa nga Pula nga mangaraway an mga sundalo nga ira iginkatigda. Ha atubangan mismo han mga kaaway dinapa an Pula nga mangaraway samtang nagpapabuto han iya dara nga pistola. Duha nga pasista nga tropa an napatay ha atubangay nga agway. Agud makahirayo, linukso an duha nga Pula nga mangaraway tipagawas han balay samtang ginpapabuthan han kaaway. Nasamaran an usa ha mga mangaraway.