Patarasak ang pagpang-agaw sang mga dumuluong nga kumpaniya kag dalagko nga burgesya kumprador sa duna nga manggad kag dutang ginpanubli sang mga tumandok kag mangunguma sa pungsod. Gamit ang pulis, militar kag ang mga korte, ginatapakan sang mga ini ang kinamatarung sang mga mangunguma sa duta, ginatapna ang ila pakigbato kag ginagamit ang layi para palayason sila sa kaugalingon nila nga duta.

Sa Sityo Marihangin, Barangay Bugsuk, Balabac, Palawan, ginkasuhan sang “squatting” ukon iligal nga pagpuyo sang siyam nga nagpang-agaw sang duta ang 282 ka residente nga tumandok sang sityo. Lakip sa ginkasuhan mga patay na kag mga bata. Sadtong Disyembre 17, nagsulong sa sityo ang ginsugo sang korte kaupod ang mga armado nga pulis agud magserbe sang TRO ukon temporary restraining order batuk sa mga residente.

Suno sa mando, indi pwede nga punggan ang pagsulod sa sityo sang mga manug-agaw sang duta sa sulod sang 20 ka adlaw. Suno sa mga residente, maathag nga may kahilabtanan ang kaso nga ini sa plano sang San Miguel Corporation (SMC) nga agawon ang ila dutang ginpanubli. Pila ka tuig na nga ginapilit sang Bricktree Properties, subsidyaryo sang SMC, nga angkunon ang duta agud tukuran sang 25,000 ektarya nga imprastrakturang pangturismo para sa sobra ka mga manggaranon sa Balabac.

Sa Dupax del Norte, Nueva Vizcaya, duha ka beses nga ginmanduan sang korte ang pagbungkag sang barikada sang mga residente batuk sa Woggle Corporation. Sadtong Disyembre 10, madinalag-on nga napunggan sang mga residente kag tawong simbahan ang pagtilaw nga pagbungkag. Liwat nagsulong ang mga pulis sadtong Disyembre 12 para bungkagon ang barikada sang mga residente sa Upper Tacbao, Barangay Bitnong. Balos ini sang kumpaniya pagkatapos makita nga nasunog ang excavator sini sadtong adlaw nga ini.

Kabulig ang PNP Dupax Del Norte, ginpahog, gin-ipit, kag ginbastos sang mga ini ang mga nagabarikada kag ginguba ang ila mga gamit. Duha ka babaye nga residente ang ginbanggaan sang mga tinawo kag ginpilit nga mag-uba. Gintayaan man sang pusil sang mga pulis ang mga residente sang igiit nila ang ila mga kinamatarung. Ginkawat man ang ila mga selpon kag ID sang nagtilaw ang mga residente nga i-dokumento ang kalakasan sa ila sang mga tinawo.