Waray wantas an panlulupot han mga langyaw nga kompaniya ngan dako nga kumprador burgesya ha natural nga karikuhan ngan ansestral nga tuna han mga minoriya ngan parag-uma ha nasud. Gamit an pulis, militar ngan an mga korte, gintatamas-tamas hini an katungod han mga parag-uma ha tuna, ginpupuypoy an ira pag-ato ngan gin-gagamit an balaud agud palayason hira ha kalugaringon nira nga tuna.

Ha Sityo Marihangin, Barangay Bugsuk, Balabac, Palawan, ginkasuhan han “squatting” o iligal nga pag-ukoy han siyam nga manlulupot han tuna an 282 nga residente nga minoriya han sityo. Kaupod ha ginkasuhan mga patay na ngan mga bata. Hadton Disyembre 17, kinadto ha sityo an tawo han korte kaupod an mga armado nga pulis agud magsalawad han TRO o temporary restraining order kontra ha mga residente.

Sigon ha mando, diri poyde ulangon an pagsulod ha sityo han mga manlulupot han tuna ha sakob han 20 kaadlaw. Sigon ha mga residente, klaro nga mayda kalabutan ini nga kaso ha plano han San Miguel Corporation (SMC) nga luputon an ira ansestral nga tuna. Pira katuig na nga ginpipirit han Bricktree Properties, subsidyaryo han SMC, nga angkunon an katunaan agud tinudgan han 25,000 kaektarya nga im-prastraktura nga panturismo para ha grabe nga mga rikuhanon ha Balabac.

Ha Dupax del Norte, Nueva Vizcaya, duha kabeses na nga ginmando han korte an pagbungkag han barikada han mga residente kontra ha Woggle Corporation. Hadton Disyembre 10, madinaugon nga napugngan han mga residente ngan tawo ha singbahan an gin-atentar nga pagbubungkag. Utro nga sinulong an mga pulis hadton Disyembre 12 agud bungkagon an barikada han mga residente han Upper Tacbao, Barangay Bitnong. Pagbulos ini han kompaniya kahuman madiskubrehan nga sunog an excavator hini hiton nga adlaw.

Kabakyang an PNP Dupax Del Norte, ginhadlok, gin-gipit, ngan ginbastos hini an mga nagbarikada ngan ginruba an ira mga gamit. Duha nga babayi nga residente an gin-ulang han mga tawuhan ngan ginpirit nga maghubo. Gintagaan liwat han pusil han mga pulis an mga residente han ig-insister nira an ira mga katungod. Ginkawat liwat an ira mga selpon ngan ID han nag-atentar an mga residente nga igsadokumento an pandarahug ha ira han mga tawuhan.