Naranggas ti panangrabsut dagiti gangannaet a kumpanya ken dadakkel a burges kumprador iti natural a kinabaknang ken ansestral a daga dagiti katutubo ken mannalon iti pagilyan. Usar dagiti pulis, militar ken dagiti korte, rabrabngisen dagitoy ti karbengan dagiti mannalon iti daga, pawpawilanda ti panaglaban ken ar-aramaten da dagiti linteg tapno papanawen isuda iti bukod da a daga.

Idiay Sityo Marihangin, Barangay Bugsuk, Balabac, Palawan, pinilaan ti siyam nga agaagaw ti daga iti kaso nga “squatting” wenno iligal a panagindeg ti 282 residente a katutubo ti sityo. Kabilang a naidarum dagiti natayen ken dagiti ubbing. Idi Disyembre 17, dimmarup iti sityo ti mangibagi iti korte kadwa da dagiti armado a pulis tapno iserbi ti TRO wenno temporary restraining order laban kadagiti residente.

Segun iti mandato, maiparit a lapdan ti panagserrek iti sityo dagiti agaagaw ti daga iti uneg ti 20 aldaw. Segun kadagiti residente, nalawag nga adda ti kainaigan daytoy a kaso iti plano ti San Miguel Corporation (SMC) nga agawen ti ansestral a daga da. Mano a tawenen a pilpiliten ti Bricktree Properties, subsidyaryo ti SMC, a tagikwaen ti daga tapno pagtakderan ti 25,000 ektarya nga imprastraktura a pangturismo para kadagiti palalo a babaknang idiay Balabac.

Idiay Dupax del Norte, Nueva Vizcaya, dua a darasen nga inmandar ti korte ti panagduprak ti barikada dagiti residente laban iti Woggle Corporation. Idi Disyembre 10, balligi a nalapdan dagiti residente ken tao’t simbaan ti gandat a panagduprak. Balbaliw a dimmarup dagiti pulis idi Disyembre 12 tapno dupraken ti barikada dagiti residente ti Upper Tacbao, Barangay Bitnong. Bales daytoy ti kumpanya kalpasan a nasarakan a napuoran ti excavator daytoy didiay nga aldaw.

Iti tulong ti PNP Dupax Del Norte, binutbuteng, linipit ken binastos dagitoy dagiti nagbarikada ken dinadael da dagiti alikamen da. Dua a babae a residente ti hinarang dagiti tauhan ken pinilit da nga aguksob. Tinutukan met dagiti pulis dagiti residente idi irupir da ti karbengan da. Tinakaw da met dagiti selpon ken ID dagiti residente idi ginandat da nga idokumento ti panangranggas kadakwada dagiti tauhan.