CBA sang Wyeth-Nestle kag unyon. Pormal nga napasira sang Wyeth Philippines Progressive Workers Union ang CBA sini sa Wyeth-Nestle Philippines sadtong Disyembre 9. Madinalag-on nga nagiit sang unyon ang dugang-sweldo nga ₱6,000 sa masunod nga tatlo ka tuig. Naagum man sang unyon ang ₱30,000 signing bonus kag mga benepisyo nga ginpakigbato nila sa ululupod nga paghulag.

Protesta sang mga mamumugon sang Gardenia kag Philfoods. Nag-aksyon ang mga mamumugon kag unyon sang Gardenia Bakeries Phils Inc kag Philfoods Fresh Baked Products Inc sa pabrika kag sa guwa sang Laguna International Industrial Park (LIIP) sa Biñan, Laguna sadtong Disyembre 19. Nagapanawagan sila sang dugang-sweldo, benepisyo kag pag-untat sa pag-atake sa mga myembro sang unyon.

Mga marinong gin-deport sang US, ginasukot ang DFA kag mga manning agency. Pagkatapos nakaagum sang arbitraryo nga deportasyon sang US, ginagiit sang mga marinong Pilipino ang ila kinamatarung, kag ginsukot ang DFA kag mga manning agency. Sa dayalogo sadtong Disyembre 12, nagpangako ang opisyal sang DFA nga padasigon ang pagproseso sang bag-o nga pasaporte sang apektado nga mga marino, bulig para mag-apelar sa pagkanselar sang visa kag kakason ang balayran angot diri.

Pag-respeto sa mga kinamatarung sa pagtrabaho, gingiit sang Wipro Cebu. Naglunsar sang silent protest ang mga empleyado sang Wipro Philippines sa Cebu kadungan sa pakig-dayalogo sang mga tiglawas nila sa kumpaniya kag DOLE sadtong Disyembre 1. Ginreklamo sang mga empleyado ang sampaw-sampaw nga mga paglapas sang kumpaniya sa ila kinamatarung sa pagtrabaho. Mayor nga reklamo nila ang indi makatarungan nga plano sang Wipro Cebu nga ipaidalum ang 400 ka empleyado sa “floating status” sugod sadtong Disyembre 15.

Mga Pilipinong mamumugon sa Taiwan, nagboto para magwelga. Nagboto sadtong Disyembre 1 para magwelga ang kababaehan nga mamumugon Pilipino sa Taidoc Technology Co. Ltd. batuk sa paglapas sang kumpaniya sa mga layi sa pagtrabaho. Lakip sa mga paglapas ang pilit nga pagpatinlo sa pabrika, estrikto nga patakaran sa dormitoryo, kag indi makatarungan nga mga balayran. ini ang pinakauna nga welga sang unyon.