CBA han Wyeth-Nestle ngan unyon. Pormal na nga ginserra han Wyeth Philippines Progressive Workers Union an CBA hini ha Wyeth-Nestle Philippines hadton Disyembre 9. Madinaugon nga nahiinsister han unyon an dugang nga suhol nga ₱6,000 ha masunod nga tulo katuig. Nakab-ot liwat han unyon an ₱30,000 nga signing bonus ngan mga benepisyo nga iginpakigbisog nira ha duruyog nga paggios.

Protesta han mga trabahador han Gardenia at Philfoods. Gumios an mga trabahador ngan unyon han Gardenia Bakeries Phils Inc ngan Philfoods Fresh Baked Products Inc ha pabrika ngan ha gawas han Laguna International Industrial Park (LIIP) ha Biñan, Laguna hadton Disyembre 19. Nanawagan hira han dugang nga suhol, benepisyo, ngan pagpaundang ha pangatake ha mga myembro han unyon.

Mga marino nga igindeport han US, ginsusukot an DFA ngan mga manning agency. Kahuman mahiagum han arbitraryo nga deportasyon han US, igin-insister han mga marino nga Pilipino an ira katungod, ngan ginsukot an DFA ngan mga manning agency. Ha dayalogo hadton Disyembre 12, nagsaad an opisyal han DFA nga padadagmiton an pagproseso han bag-o nga pasaporte han apektado nga mga marino, bulig para mag-apelar ha pagkansela han visa ngan pagtanggal han kabaraydan kasumpay hini.

Pagrespeto ha mga katungod ha pagtrabaho, igin-insister ha Wipro Cebu. Naglansar han silent protest an mga empleyado han Wipro Philippines ha Cebu kadungan han pakikigdayalogo han mga tinaglawas nira ha kompaniya ngan DOLE hadton Disyembre 1. Iginreklamo han mga empleyado an luun-luon nga mga pagtalapas han kompaniya ha ira katungod ha pagtrabaho. Prinsipal nga reklamo nira an diri makatadungan nga plano han Wipro Cebu nga igpailarum an 400 nga empleyado ha “floating status” tikang hadton Disyembre 15.

Mga Pilipino nga trabahador ha Taiwan, binoto para magwelga. Binoto hadton Disyembre 1 agud magwelga an kababayin-an nga trabahador nga Pilipino ha Taidoc Technology Co. Ltd kontra ha pagtalapas han kompaniya ha mga balaud ha pagtrabaho. Kalakip ha mga pagtalapas an pwersahay nga pagpapalimpyo ha pabrika, mahugot nga palisiya ha dormitoryo, ngan diri makatadungan nga mga kabarayadan. Ini an pinakasyahan nga welga han unyon.