CBA ti Wyeth-Nestle ken unyon. Pormal a naiserra ti Wyeth Philippines Progressive Workers Union ti CBA daytoy iti Wyeth-Nestle Philippines idi Disyembre 9. Balligi a nairupir ti unyon ti nayon a sweldo a ₱6,000 iti sumaruno a tawen. Nagun-od met ti unyon ti ₱30,000 signing bonus ken dagiti benepisyo a nailaban da iti sangsangkamaysa a tignay.

Protesta dagiti mangmangged ti Gardenia ken Philfoods. Nagtignay dagiti mangmangged ken unyon ti Gardenia Bakeries Phils Inc ken Philfoods Fresh Baked Products Inc iti pabrika ken iti ruar ti Laguna International Industrial Park (LIIP) idiay Biñan, Laguna idi Disyembre 19. Immawag da ti nayon a sweldo, benepisyo ken panagsardeng iti panagatake kadagiti kameng ti unyon.

DFA ken dagiti manning agency, siningir dagiti marino a dineport ti US. Kalpasan a nakapadas ti arbitraryo a deportasyon ti US, inpetteng dagiti marino a Pilipino ti karbengan da, ken siningir da ti DFA ken dagiti manning agency. Iti dayalogo idi Disyembre 12, nagkari ti upisyal ti DFA a papardasen ti panagiproseso ti baro a pasaporte dagiti apektado a marino, tulong tapno umapela iti panangkanselar ti visa ken ikkaten dagiti babayadan kanaig ditoy.

Panangrespetar kadagiti karbengan iti tegged, nairupir iti Wipro Cebu. Nagisayangkat ti naulimek a protesta dagiti empleyado ti Wipro Philippines idiay Cebu kagiddan ti pannakidayalogo dagiti mangibagi kadakwada iti kumpanya ken DOLE idi Disyembre 1. Inreklamo dagiti empleyado ti agtutuon a panaglabsing ti kumpanya iti karbengan da iti tegged. Kangrunaan nga arungaing da ti saan nga nainkalintegan a plano ti Wipro Cebu nga ipasidong ti 400 empleyado iti “floating status” manipud idi Disyembre 15.

Dagiti Pilipino a mangmangged idiay Taiwan, nagbotos tapno agwelga. Nagbotos idi Disyembre 1 tapno agwelga ti babbai a Pilipino iti Taidoc Technology Co. Ltd. Laban iti panaglabsing ti kumpanya kadagiti linteg iti tegged. Kabilang kadagiti panaglabsing ti inkapilitan a panagpadalus iti pabrika, nairut a patakaran iti dormitoryo ken saan a nainkalintegan a babayadan. Daytoy ti kaunaan a welga ti unyon.