Naturok an bag-o nga henerasyon han mga manurunod han rebolusyunaryo nga kagiusan ha Eastern Visayas atubangan han dagko nga ayat ha pagpapasulong han demokratiko nga rebolusyon han katawhan. Dirudiretso an panalinguha han Kabataang Makabayan (KM) ha rehiyon agud padamuon an mga kaapi hini ngan tukuron an mga tsapter diin man poyde. Pira ha membro han KM ha rehiyon hira Ka Terry, Ka Patrick, Ka Roan ngan Ka Owen.

Hi Ka Terry estudyante ha usa nga kolehiyo. Ginkakaatubang nira an pan-gigipit han administrasyon, panre-red tag ngan paniktik han militar. Ha luyo hini, maaram hiya nga malalapayan nira an mga ayat ha pag-oorganisa. “Ha tukma nga pangangandam, koordinasyon, ngan pagpinsar, mauungbawan namon an mga ulang ha pag-oorganisa,” sering niya.

Komo mainadmanon nga estudyante, napukaw hi Ka Patrick ha kamutangan han katilingban ngan pinartisipar ha mga panmasa nga pakigbisog. Han marekrut ha KM, nasantop niya nga an pag-api ha grupo an sunod nga pitad ngan kinahanglan niya himuon. Tungod ha kakulangan ha eksperyensya, nagkamayda hin kakurian hi Ka Patrick ha pag-oorganisa ha igkasi kabatan-unan. “Kundi bisan makuri nakakaya pa gihap namon nga mag-organisa han mga paggios,” sigon ha iya.

Pasismo han estado an nagpukaw kan Ka Roan nga hasugon an dalan han rebolusyunaryo nga pakigbisog. Napukaw hiya han nakit-an niya an pagdakop han mga ahente han estado ha ordinaryo nga mga tawo nga nakikigbisog. Nagin kaapi hiya han KM ngan nagdesisyon nga ihatag an bug-os nga panahon ha pag-oorganisa. Nagpursige hira ha pag-oorganisa ha luyo han pag-eksister han kahadlok ha damo nga estudyante.

“Amon gud la ini gintindugan ngan waray talaga kami pagbaya ha buruhaton nga igintuin ha amon,” sering niya. Nagin yawe kuno ha pagbuylo nira an pangalap han mag-upay nga praktis tikang ha iba nga lugar ngan paghaum hini ha ira eksperyensya.

Napukaw hi Ka Owen ha mga problema han katilingban han nabalitaan an pagpatay han militar kan Chad Booc, usa nga boluntir nga magturutdo ha mga Lumad ha Mindanao. Ha dugang nga pagsantop ha grabe nga pasismo han estado, diri pala maiha nagpahayag hiya han karuyagon nga mag-integreyt ha yunit han Bagong Hukbong Bayan (BHB).

Gintagan inspirasyon hiya mismo han kaurupdan nga kaparte han hukbo han katawhan. “Idol ko an BHB. Damo na ako nga nakilala nga kabatan-unan nga kaparte na yana han hukbo ngan aram ko an ira rason. Estado na mismo an nagduduso ha katawhan nga mag-armas. Ini an pamaagi agud mabag-o an sistema,” sering niya.

Tikang ha Larab, rebolusyunaryo nga mantalaan ha Eastern Visayas