Mismo hadton Enero 3, adlaw han armado nga pag-atake han panmilitar nga pwersa han US ha Venezuela, ngan pagsikmit ha presidente hini nga hi Maduro, ngan ha iya asawa nga hi Cilia Flores, nagrabunos ha kalsada an nag-aalsa nga katawhan nga Venenzuelan. Ginsukna nira an atake ha ira soberaniya ngan igin-insister an dagmit nga pagpapabalik han ira presidente ngan asawa hini.

“An katuyuanan hini nga pag-atake waray iba kundi agawon an estratehiko nga mga rekurso han Venezuela, partikular an lana ngan mga mineral, ha pag-atentar nga rub-on an independensya ha pulitika han nasud. Diri hira magdadaug,” sigon ha gubyerno nga Venenzuelan ha syahan nga upisyal nga pahayag hini kahuman han agresyon. Mahugot hini nga iginsalikway ngan ginkundenar an militar nga agresyon nga nagtarget ha teritoryo ngan magkalain-lain nga sibilyan ngan panmilitar nga pasilidad ha nasud. Masobra 80 nga Venenzuelan an nahireport nga napatay ha pangatake.

Pira kaoras kahuman an pagsikmit, bug-os nga paghinambog nga igindeklara ni Donald Trump nga an US na an “magdudumara” han Venezuela, kalakip an higluag nga rekurso hini ha lana. An pagtanggal kan Maduro hul-os nga ginsuportahan han hakog ha lana ngan rekurso han mga nasud ha European Union, sugad liwat han Japan, Australia ngan iba pa nga mga niyutiyo nga estado han US. Layon hira nga nanawagan han “mamurayaw nga transisyon” agud ibutang an usa nga niyutiyo nga estado nga mag-aabre ha Venezuela ha pandambong han dagko nga kompaniya ha lana. Ginsusuportahan liwat ini han mga sosyal demokrata nga grupo nga nagpopostura nga kontra agresyon kundi nakiduyog ha paghahatag rason ha pagkidnap kan Maduro.

Ginsukna han Partido Komunista ng Pilipinas an panmilitar nga agresyon han imperyalismo nga US ha Venezuela. Gintawag hini nga “tuyaw nga pasista” hi Trump ha pagmando han pag-atake ha Venezuela. Sering han Partido, piho nga paglalarabon hini an patriyotiko nga kangalas han katawhan nga Venenzuelan.

Diri napaperdi nga panindugan

“¡Maduro, aguanta, que el pueblo se levanta!” (Maduro, kapot la, nag-aalsa an katawhan!) an guliat han mga Venenzuelan ha kakalsadahan. Gatus-gatos kayukot an binuhos ha Caracas ngan iba pa nga parte han nasud agud ipahayag an ira pagsuporta ngan ipaabot an ira paghigugma kan Maduro ngan kan Flores, an gin-ngaranan nga “syahan nga kombatant” han nasud. Nagsunog hira han mga bandera han US.

“Hinaot masantop han mga ekstremista nga an mga bomba nga ginhangyo nira (ha US) nagpatay ngan mapatay ha ngatanan nga mga Venenzuelan, Chavista man o diri,” pahayag han usa nga raliyista. An mga “ekstremista” nga gintudlok niya amo an mga partido nga ginpondohan han US nga ginpapamunuan han mga nawotawo hini nga hi Maria Machado. Maiha na nga ginhangyo ni Machado nga atakihon han US an Venezuela agud pabagsakon an gubyerno nga Maduro ngan ibutang hiya ngan iya mga kakunsabo ha estado. Sugadpaman, waray hiya iginbutang ni Trump. Sobra nga ginkakangalsan hi Machado han iya mga kanasud.

Hadton Enero 4, nagsumpa komo temporaryo nga presidente hi Delcy Rodriguez, bise presidente han Venezuela, subay ha konstitusyon han nasud. Ginpagios liwat han armado nga hukbo an hiluag nga milisya nga igintukod hini para ha depensa han iroy nga tuna.

Internasyunal nga suporta

Madagmit ngan mahugot an pagkundenar ha agresyon han US ngan pagsikmit kanda Maduro ngan Flores ha Latin America, Africa ngan iba pa nga mga nasud. Layon nga tinindog para kan Maduro ngan ha Venezuela an Cuba, Nicaragua ngan Colombia. Nagpahayag naman han mahugot nga pagtipa an Brazil, Uruguay ngan Mexico ha ginhimo nga pag-atake. Iginkokonsidera nira an agresyon komo atake diri la ha Venezuela kundi ha bug-os nga Latin America ngan mga nasud nga naato ha imperyalista nga hegemoniya han US. Hini nga mga nasud, nagrabunos an mga katawhan ha kakalsadahan agud suportahan an mga Venenzuelan.

Nagkamayda han kadungan nga mga rali ha atubangan han mga embahada han US ha Germany, Spain, Belgium, France, Greece ngan Turkey. Ha sakob han US, ginsukna han mga Amerikano an agresyon han kalugaringon nira nga gubyerno ha mga paggios ha gawas han White House, ha New York (kun diin gindara hi Maduro) ngan pira pa nga syudad.

Ha Pilipinas, nagmartsa tipakadto ha embahada han US ha Manila an mga progresibo nga grupo ha pangunguna han Bagong Alyansang Makabayan ngan Philippine-Bolivarian Venezuela Friendship Association hadton Enero 5. Ginkundenar nira an agresyon han US ngan naghatag hira han suporta ha katawhan Venenzuelan ngan ira gubyerno.