Hiluagan nga iginlansar han mga progresibo nga grupo an kampanya ha pagbisita ngan pangangalap han suporta para ha mga priso pulitikal han Pilipinas hadton Disyembre 2025. Gumios ngan nagpartisipar ha kampanya an mga tagdepensa han tawhanon nga katungod, kaurupdan han mga priso pulitikal, tawo ha singbahan, mga abugado, kabatan-unan, kababayin-an, trabahador ngan mga internasyunal nga grupo.

Nahireport an pagbisita ha mga prisuhan ha Northern Luzon, Aurora, Nueva Ecija, Bulacan, Laguna, Metro Manila, Iloilo, Tacloban City, Butuan City, North Cotabato, ngan Davao City. Gindad-an an mga priso pulitikal han mga pagkaon, higamit para ha kalimpyuhan, medisina ngan mga surat nga nagpapahayag han suporta ha ira pakigbisog para makagawas.

Mayda haros 700 nga priso pulitikal ha Pilipinas kun diin sobra 160 an gin-aresto ha panahon han rehimen Marcos. Kaupod dinhi an diri mamenos ha 136 nga priso nga babaye, 93 nga kalagsan ngan 89 nga mayda sakit.