Nagtitikang pala an tuig, inarangkada na an makinarya nga pan-gerra han imperyalismo nga US, ha pangunguna han tuyaw nga pasista nga hi Donald Trump, presidente han US. Hadton Enero 3, dudrungan hini nga ginbomba an Caracas, sentro nga syudad han Venezuela, ngan iba pa nga kasapit nga rehiyon, ngan iginlansar an panmilitar nga operasyon agud sikmiton hi President Nicolas Maduro ngan asawa niya nga hi Cilia Flores agud pwersahay nga dad-on hira ha US.

Anu-ano nala an hinimu-himo ni Trump nga akusasyon kontra kan Maduro, sugad han inimbento nga “drug cartel” nga iya kuno ginpapamunuan, agud tagan rason an butaray nga iligal nga operasyon. Kundi maaram an bug-os nga kalibutan han tinuod nga hinungdan: an lana han Venezuela nga ginlalawayan ngan gin-aangkon ni Trump nga “ira.” Nag-amin liwat ni Trump, han igdeklara nga “dudumaraon namon an Venezuela ngan kokontrolon an iya lana.”

Butaray nga armado nga agresyon para ha pandambong an pag-atake han imperyalista nga hambog ha nasud nga nagdedepensa han iya katalwasan. Kahuman sikmiton hi President Maduro, gintarhug naman yana ni Trump an sumaliwan nga hi Delcy Rodriguez, agud pwersahon nga sumunod ha iya dikta. Nagkakaurusa yana an katawhan han Venezuela ha pagtindog ngan pag-ato. Ha kalsada, nagkakaurusa nira nga guliat, “Ibalik ha amon hi Maduro!”

Hiluagan liwat nga ginsukna han damo nga nasud an pangatake han US tungod ha pagtalapas hini ha mga internasyunal nga balaud ngan pagsurundon han United Nations. Nagpahayag han “kabaraka” bisan an mga igkasi ngan alyado nga imperyalista han US, bisan kun ginpili nira nga pumiliw la. Mayda naman mga grupo nga maka-US nga “nababaraka” ha agresyon han US, kundi mamingaw nga napakpak liwat ha pagsikmit han US ha kontra-imperyalista nga hi Maduro.

An panmilitar nga agresyon han US ha Venezuela diri syahan, ngan piho nga diri urhi nga pagtamak hini ha mga talwas nga nasud ha magkalain-lain nga parte han kalibutan. Tikang han mahuman an Ikaduha nga Gerra Mundyal, an US nanakop, nangatake, nanginlabot, nagpatay ha mga lider, nagkudeta, nagbutang ngan sumuporta ha mga maka-US nga pasista nga diktadura ha diri mamenos ha 30 nga nasud, kadak-an ha Latin America, hasta na ha Asia kalakip an Middle East. Gintatarhug liwat yana han US an Iran, nga sugad han Venezuela, riko ha lana, ngan ginpili nga ignasyunalisa ini. Gintatarhug liwat han pasista nga tuyaw an Mexico, Canada, ngan Greenland.

Ha ilarum han bag-o nga ginpirmahan nga National Security Strategy (NSS) ni Trump, igindeklara hini an plano nga himuon nga “pinakapoderoso ngan pinakamakamaratay” an panmilitar nga pwersa han US. Igindeklara ni Trump an plano nga pagkudal ha Latin America, nga iginkokonsidera nira nga “amon nga natad.” Usa ini nga hulga kontra ha Cuba, Colombia, Brazil ngan iba pa nga nasud nga nag-uundong han ira katungod ha kalugaringon nga pagdedesisyon.

An butaray nga pag-atake han US ha Venezuela bag-o nga balitang han paggrabe han pasista nga terorismo han US, atubangan han natikagrabe nga imperyalista nga kontradiksyon. Iginpakita han pasista nga hi Trump nga waray balaud nga maulang ha iya katuyawan. Sobra nga nababaraka an mga karibal ngan alyado han US nga gamiton an lana han Venezuela komo armas pampulitika ngan pan-ekonomiya kontra ha ira ha porma han pag-impluwensya ha pankalibutan nga suplay ngan presyo.

Ha pangunguna han US, natikadako pa yana an igin-aalutaga nga pondo ha panmilitar nga kagarastuhan. Sinulod na ha bag-o nga balitang han militarisasyon an imperyalista nga Japan ha pagbuhos hini han waray pa nga katupong nga kadakuon han pondo ha panmilitar nga produksyon. Tikadako liwat an panmilitar nga kagarastuhan han mga imperyalista nga nasud ha Europe. Kaugop man han US ha NATO, an France ngan Germany natipa ha iginduduso han US nga kasarabutan ha Ukraine, tungod kay sobra an iginhahatag hini nga kontrol ha US ha rekurso han nasud, nga disbentaha han mga imperyalista ha Europe.

Pangilal-an han natikahilarum nga krisis han imperyalismo an natikagrabe nga pag-aagaway han pinakadako nga poder para ha surok han barato nga hilaw nga materyales, ngan matatambakan han sobra nga kapital ha porma han pagpapautang ngan pamumuhunan. Agaway ha teretoryo an hinungdan han naglalarab nga mga gerra ha magkalain-lain nga parte han kalibutan, tikang ha proksi nga gerra han US ha Ukraine kontra ha Russia, pagrumok han US ngan Zionista nga Israel ha Gaza, pag-agaw han mga imperyalista ha Syria, panmomba han US ha Yemen ngan Somalia, ngan pakiggitgitay han US ha China ha South China Sea.

Hini nga konteksto, hul-os nga masasantop an tikadako nga presensya han panmilitar nga pwersa han US ha Pilipinas, an pagdamo han mga base militar hini ha magkalain-lain nga parte han nasud, an pagbubutang han magbakod nga armas, an permanente nga paglalayag han mga nabal nga pwersa hini ha kadagatan han nasud, an waray hunong nga panmilitar ngan ehersiyo ngan panunulsol han agway ha Taiwan. Igintukod han US an Task Force Philippines agud pahugton an paghahadi hini ha Pilipinas. Ha masunod nga lima katuig, plano han US nga magbuhos hin $2.5 kabilyon nga panmilitar nga ayuda tubtub ha 2030.

Ngatanan ini waray kalabutan ha “pag-ungbaw han balaud” o “kalibrihan ha paglalayag” ha kadagatan. Kahuman han iginpakita han US ha Venezuela nga pagtamak ha mga pankalibutan nga pagsurundon, mga tuyaw ngan buta nga niyutiyo han US na la (an AFP, hi Marcos ngan grupo nga sugad han Akbayan) an napakpak ha pagpupulis-pulisan han US ha South China Sea.

Dugang nga waray kalabutan an presensya han US ha ginhihinambog nga pagdepensa han katalwasan han Pilipinas. Sukwahi dinhi, an tikadamo nga mga sundalo nga Amerikano ngan iba pa nga dara hini nga langyaw nga tropa ha Pilipinas an pinakadako nga pagtamas-tamas ha soberaniya han nasud. Diri la gin-gagamit han US an nasud para ha iya imperyalista nga interes, gindadanas liwat hini an Pilipinas ha gerra nga sukwahi ha kaupayan han nasud. Ginpapakusog hini an AFP agud magserbe hini nga kabakyang ha pagpuypoy ha katawhan nga naato.

Atubangan han natikagrabe nga imperyalista nga sumpakiay, panmilitar nga agresyon, pasismo ngan panunulsol han gerra han imperyalismo nga US, kinahanglan pakusgon han katawhan Pilipino an ira pakigbisog para ha tinuod nga katalwasan ngan demokrasya. Kadungan hini, kinahanglan makig-usa ha pinakahiluag nga ranggo han katawhan ha bug-os nga kalibutan agud ulangon an arangkada han gerra ngan pasismo ha bug-os nga kalibutan.