Pamatuod an mga selebrasyon ha nasud ngan langyaw nga labnasan ha ika-57 nga anibersaryo han Partido Komunista ng Pilipinas (PKP) han padayon nga pagpupursige han bug-os nga rebolusyunaryo nga kagiusan. Dako nga tampalo ha nawong han rehimen US-Marcos nga ha magkalain-lain nga lugar iginpalakpakay an Pula nga bandera nga mayda bulawanon nga maso ngan karit agud saludaran an haros unom kadekada han pamumuno han Partido ha demokratiko nga rebolusyon han katawhan ha Pilipinas.

An mga pagselebrar iginlansar han mga sanga ngan komite han Partido, mga yunit han Bagong Hukbong Bayan (BHB) ngan mga tsapter ngan alyado nga organisasyon han National Democratic Front (NDF). Samtang, nagpaabot liwat han pagbati an mga partido ngan organisasyon tikang ha iba nga nasud.

Ha mga katitirok, nagin landaw an pagtalakay ha mensahe han Komite Sentral han Partido para ha anibersaryo. Ginapasidunggan gihap hini nga mga aktibidad an mga martir han katawhan ha naglabay nga mga dekada.

Ha mga prente gerilya, naghalad (nagtanghal) han armas an mga Pula nga marangaraway han BHB agud magsaludar ha Partido, bisan kun padayon an pankombat nga operasyon han Armed Forces of the Philippines (AFP). Iginreport an mga selebrasyon han BHB ha Cagayan Valley, Southern Tagalog, Negros Island, Eastern Visayas, ngan North Central Mindanao. Magpapadayon ha masunod nga mga adlaw an mga aktibidad han magkalain-lain pa nga yunit.

Ha Southern Tagalog, nahilansar han BHB ha mga prente gerilya ha Batangas, Quezon ngan Mindoro an mga serye han katitirok. Magkabulag nga pagselebrar an iginlansar ha mga isla han Samar ngan Leyte, ha Eastern Visayas. Ha North Central Mindanao, gin-gamit nga higayon an selebrasyon agud konsolidahon an mga Pula nga mangaraway ngan makapaglansar han pankultural nga programa. Katutngaan na han gab-i han mahuman an aktibidad.

Sigon ha mga report, landaw gud ha mga Pula nga mangaraway an nagin positibo nga epekto ha pag-aram ha pahayag han Komite Sentral. Nakabulig kuno ini agud igsalikway an mga bagahe nga nagpapabug-at ngan nagpapahinay ha mahinungdanon nga pag-unhan han kada iya mga buruhaton. Hini nga mga okasyon, mahugot nga ginpatuman han BHB an ukoy-bubto nga iginmando han Komite Sentral ha igintalaan nga mga adlaw.

Ha mga sentro nga bungto ngan syudad, naglansar han mga martsa, sikreto nga katitirok, operasyon pintar ngan operasyon pilit (OP-OD) ngan iba pa nga aktibidad an mga tsapter ngan alyado han NDF. Nagtikang ini hadton ikatulo nga semana han Disyembre 2025 ngan nagpadayon tubtub hini nga Enero.

Ha Metro Manila, magkasunod nga martsa an iginlansar ha Manila ngan Pasay City hadton Disyembre 21 ngan 22, 2025. Kaupod ha mga grupo nga nagpartisipar ha protesta an Kabataang Makabayan (KM), Artista at Manunulat ng Sambayanan (Armas), Makabayang Kilusan ng Bagong Kababaihan (Makibaka), Revolutionary Council of Trade Unions, Makabayang Kawaning Pilipino ngan Compatriots.

Ha Central Luzon, nahilansar an katitirok hadton Disyembre 26, 2025 ha usa nga waray igtudlok nga lokasyon. Ha Rizal, iginlansar han NDF an katitirok hadton Disyembre 30, 2025 nga ginsundan han pagsasab-ong han duha nga higante nga balatengga hadton Enero 2 ha Antipolo City.

Ha pangunguna han Compatriots Philippines, masobra 100 katawo an tinambong ha usa nga pankultural nga programa ha usa nga lokasyon ha Southern Tagalog. Tinambong liwat an mga membro han grupo tikang ha Rizal, Bulacan ngan Metro Manila, ngan mga kapamilya han mga martir han katawhan. Pira kaadlaw antes hini, nagsab-ong han mga balatengga an grupo ha kahilab-on han Commonwealth Avenue ha Quezon City.

Ha Australia, naglansar han katitirok ngan operasyon-pilit an Compatriots-NDFP-Australia ngan Compatriots-KM-Narmm. Masobra 300 naman an nagpartisipar ha online broadcast han NDF International Office agud basahon an pahayag han Komite Sentral.

“An pagpupursige ngan dedikasyon [han Partido] nga igpatuman an makasaysayan nga responsabilidad ha pagpapasulong han ungara han katawhan naghatag inspirasyon ngan padayon nga nakakapaghatag inspirasyon ha masa nga bumuhat,” sering ni Ka Elias Dipasupil, pankabug-usan nga sekretaryo han NDF. Dugang niya, mas napapakusog han Partido an pamumuno hini ha masa nga Pilipino ha pagpupursige ha presente nga kagiusan pagtutul-id.

Damo pa nga iba nga tsapter ngan alyado han NDF an nagpagawas han pahayag para ha anibersaryo han Partido.