Nagatubo ang bag-ong henerasyon sa mga tigpanunod sa rebolusyonaryong kalihukan sa Eastern Visayas atubangan sa dagkung hagit sa pagpaasdang sa demokratikong rebolusyon sa katawhan. Padayon ang paningkamot sa Kabataang Makabayan (KM) sa rehiyon aron padaghanon ang mga myembro niini ug tukuron ang mga balangay asaman posible. Pipila sa myembro sa KM sa rehiyon mao silang Ka Terry, Ka Patrick, Ka Roan ug Ka Owen.

Si Ka Terry, usa ka estudyante sa usa ka kolehiyo. Ginaatubang nila ang pagpamig-ot sa administrasyon, pagpang-redtag ug pagpaniktik sa militar. Bisan pa man, sayod siyang ilang mapatigbabawan ang mga pagsulay sa pag-organisa. “Sa hustong pagpangandam, koordinasyon, ug paghunahuna, mapatigbabawan namo ang mga babag sa pag-organisa,” matud niya.

Isip matukitukiong estudyante, nahikmata si Ka Patrick sa kahimtang sa katilingban ug misalmot sa mga pakigbisog sa masa. Dihang girekrut sa KM, iyang naamguhan nga ang pagsalmot sa grupo ang sunod nga lakang nga angay niyang himuon. Tungod sa kakulang sa kasinatian, naglisud si Ka Patrick sa pag-organisa sa mga parehong kabatan-onan. “Apan bisan nga lisud, nakaya pa gihapon namong mag-organisa og mga protesta,” matud niya.

Pasismo sa estado ang naghigmata kang Ka Roan nga baktason ang dalan sa rebolusyonaryong pakigbisog. Napukaw siya sa nasaksihan niyang pagdakop sa mga ahente sa estado sa ordinaryong mga tawong nagasukol. Nahimo siyang myembro sa KM ug nagdesisyon nga igahin ang tibuok panahon sa pag-organisa. Naningkamot sila sa pag-organisa sa taliwala sa pagpatigbabaw sa kahadlok sa daghang estudyante.

“Amo gyud kining gibarugan ug wala gyud namo gitalikdan ang tahas nga gisangon kanamo,” matud niya. Nahimong yawe kuno sa pagbwelo nila ang pagpangalap og maayong na praktika gikan sa laing lugar ug pagdapat niini sa ilang kasinatian.

Namatngunan ni Ka Owen ang mga problema sa katilingban dihang nabalitaan ang pagpatay sa militar kang Chad Booc, usa ka boluntir nga magtutudlo sa mga Lumad sa Mindanao. Sa lalum nga pagsabot sa grabeng pasismo sa estado, bag-o lang nagpahayag siya og kagustuhang makigsandurot sa yunit ng Bagong Hukbong Bayan (BHB).

Naghatag inspirasyon kaniya ang mismong paryente nga sakop sa hukbong bayan. “Idol ko ang BHB. Daghan na kog nakaila nga batan-ong sakop na karon sa hukbo ug sayod ko sa ilang rason. Estado na mismo ang nagtukmod sa katawhan nga mag-armas. Kini lang ang pamaagi aron mausab ang sistema,” matud niya.

Kinutlo gikan sa Larab, rebolusyonaryong mantalaan sa Eastern Visayas.