Naga-usbong ang bag-o nga henerasyon sang mga manunubli sang rebolusyonaryong kahublagan sa Eastern Visayas sa atubang sang mga dalagko nga hangkat sa pagpasulong sang demokratikong rebolusyon sang banwa. Tayuyon ang pagtinguha sang Kabataang Makabayan (KM) sa rehiyon agud padamuon ang mga katapo sini kag tukuron ang mga tsapter diin man pwede. Pila sa myembro sang KM sa rehiyon sanday Ka Terry, Ka Patrick, Ka Roan kag Ka Owen.

Si Ka Terry, estudyante sa isa ka kolehiyo. Ginaatubang nila ang pagpang-ipit sang administrasyon, pagpang-redtag kag pagpanilag sang militar. Sa pihak sini, kahibalo siya nga malampuwasan nila ang mga pagtilaw sa pag-organisa. “Sa husto nga paghanda, koordinasyon, kag pamensar, mapangibabawan namon ang mga upang sa pag-organisa,” siling niya.

Bilang maayo nga tig-obserbar nga estudyante, nakamuklat si Ka Patrick sa kahimtangan sang sosyedad kag nagpakigbahin sa mga paghimakas masa. Sang gin-rekrut sa KM, nareyalisar niya nga ang pagbuylog sa grupo ang sunod nga tikang nga dapat niya nga himuon. Tungod sa kakulangan sang eksperyensiya, may kabudlayan si Ka Patrick sa pag-organisa sa kasubong nga mga pamatan-on. “Apang bisan pa mabudlay masarangan pa gihapon namon nga mag-organisa sang mga aksyon,” suno sa iya.

Pasismo sang estado ang nagpamuklat kay Ka Roan nga usoyon ang banas sang rebolusyonaryong paghimakas. Napukaw siya sang nasaksihan niya ang pagdakop sang mga ahente sang estado sa ordinaryo nga mga tawo nga nagapakigbato. Nangin katapo siya sang KM kag nagdesisyon nga ihatag ang bug-os nga panahon sa pag-organisa. Nagpanikasog sila sa pag-organisa sa pihak sang pagpangibabaw sang kahadlok sa madamo nga estudyante.

“Gintindugan na lang gid namon ini kag wala gid namon ginbayaan ang katungdanan nga ginhatag sa amon,” suno sa iya. Nangin yabi kuno sa pagbwelo nila ang pagpangalap sang mga maayo nga praktis halin sa iban nga lugar kag pagpasanto sini sa ila inagihan.

Nakamuklat si Ka Owen, sa mga problema sang sosyedad sang nabalitaan ang pagpatay sang militar kay Chad Booc, isa ka boluntir nga manunudlo sa mga Lumad sa Mindanao. Sa lubos nga paghangup sa masingki nga pasismo sang estado, sang sini lang nagpahayag siya sang kagustuhan nga magpangabuhi sa yunit sang Bagong Hukbong Bayan (BHB).

Ginhatagan siya mismo sang inspirasyon sang himata nga kabahin sang hukbo sang banwa. “Idol ko ang BHB. Madamo na ako sang nakilala nga pamatan-on nga kabahin na subong sang hukbo kag kahibalo ako sang ila rason. Estado na mismo ang nagatulod sa pumuluyo nga mag-armas. Ini lang ang pamaagi agud mabag-o ang sistema,” suno sa iya.

Ginkuha sa Larab, rebolusyonaryong pahayagan sa Eastern Visayas.