Waray wantas an Armed Forces of the Philippines (AFP) ngan Philippine National Police (PNP) ha pagsasabrag han terorismo ngan pag-atake ha mga komunidad ngan katawhan bisan ha panahon han Pasko ngan Bag-o nga Tuig. Antes nahuman an 2025, nahilista an mga kaso han pagpatay, pagsikmit, pag-aresto ngan iba pa nga pagtalapas ha tawhanon nga katungod.

Pagpatay. Apikihay nga ginpusil han mga tawuhan han AFP an babaye nga lider-parag-uma nga hi Warlita Jimenez, 55, ha Sityo Makilo, Barangay Camansi, Kabankalan City ha Negros Occidental hadton Disyembre 23, 2025. An biktima asawa han lider-parag-uma nga hi Joseph Jimenez nga ginpatay han 15th IB hadton Nobyembre 30, 2022.

Pagsikmit. Ginsikmit han mga pwersa han estado an tawuhan han National Democratic Front-Cagayan Valley (NDF-CV) nga hi Scarlet Lyne Gayo. Urhi nga nakit-an hi Gayo ha Cavite hadton Disyembre 9, 2025 ngan diri pa gihap makontak hasta yana. Nababaraka an NDF-CV ha katalwasan ngan kinabuhi ni Gayo.

Pag-aresto. Ha Occidental Mindoro, gin-aresto han gintib-ob nga pwersa han pulis ngan 76th IB hi Ramon “Monet” Alcantara ha Barangay San Vicente, Abra de Ilog hadton Disyembre 23, 2025. Gin-akusaran hiya nga dabi ha usa nga engkwentro han 76th IB ngan BHB. Hi Alcantara aktibo nga natipa ha pagmimina ha Mindoro ngan nagpapasulong han katungod han mga minoriya nga Mangyan para ha ira ansestral nga tuna. Dinalagan hiya ha pagkameyor han Abra de Ilog hadton eleksyon 2022.

Ha Baguio City, gin-aresto han mga pulis an tagapagyakan han Kilusang Mayo Uno-Cordillera nga hi Mike Cabangon hadton Disyembre 27, 2025. Naatubang hiya ha kaso nga “terrorism financing.” Nakagawas hiya kahuman magpiyansa.

Ha Manila, utro nga gin-aresto han mga pulis hadton Disyembre 18, 2025 hi Ryan Ombrog ha kaso nga panununog. Kaupod hi Ombog ha masobra 270 nga gin-aresto katapos an protesta kontra korapsyon hadton Septyembre 21, 2025.

Panmusil. Ha Leyte, nagreklamo hadton Disyembre 2025 an mga residente han Barangay Villa Corazon, Burauen ha pauru-utro nga waray wantas nga panmusil han CAFGU (Citizen Armed Force Geographical Unit) ha komunidad. Pira kabeses na kuno nga tigdaay nala nga napabuto ini ha ira kampo ha kabutngaan han gab-i o kaagahon. Iginkakabarak-an liwat han mga residente an paghurubog han mga tawuhan han CAFGU ha mismo nga kampo militar.

Pan-gigipit. Pira kaadlaw antes an pagselebrar ha Pasko, ginsulong ngan naglansar han waray hunong nga atake an 62nd IB ha mga komunidad han Guihulngan City ngan Moises Padilla ha isla han Negros. Ha sakob han 10 kaadlaw tikang Disyembre 13, 2025, naglansar an mga elemento hini han iligal nga pagsulod ngan pagrekisa ha mga balay, panhahadlok ngan pananarhug, ngan pagpatay ha usa nga karabaw.