Rumusrusing ti baro a henerasyon dagiti agtawid ti rebolusyonaryo a tignay idiay Eastern Visayas iti sango ti dadakkel a karit iti panangiyabante ti demokratiko a rebolusyon ti umili. Agtultuloy nga ikagkagumaan ti Kabataang Makabayan (KM) iti rehiyon a paadwen dagiti kameng da ken itakder dagiti balangay sadinno man a mabalin. Kabilang kadagiti kameng ti KM iti rehiyon da Ka Terry, Ka Patrick, Ka Roan ken Ka Owen.

Ni Ka Terry ket agad-adal iti maysa a kolehiyo. Sangsangwen da ti panaglipit ti administrasyon, panagred-tag ken panagtiktik ti militar. Iti laksid daytoy, siaammo da a marimbawan da dagiti pannubok iti panagorganisa. “Iti usto a panagsagana, koordinasyon ken panagpanunot, marimbawan mi dagiti tubeng iti panagorganisa,” kunana.

Kas managpaliiw nga estudyante, ni Ka Patrick ket nariing iti kasasaad ti gimong ken nakipaset kadagiti dangadang ti masa. Idi narekrut iti KM, naamiris na a ti panagkameng iti grupo ti sumaruno nga addang a rumbeng na nga aramiden. Gapu iti kinakurang ti kapadasan, narigatan ni Ka Patrick iti panagorganisa kadagiti pada na a kabataan. “Ngem uray narigat, mabaelan mi pay laeng nga agorganisa kadagiti tignay,” segun kenkwana.

Ti pasismo ti estado ti nangriing ken Ka Roan a dalyasaten ti rebolusyonaryo a dangadang. Nariing isuna idi naimatangan na ti panangkemmeg dagiti ahente ti estado kadagiti ordinaryo a tao a lumablaban. Nagkameng isuna iti KM ken nangngeddeng nga ipaay ti sibubukel a panawen na iti panagorganisa. Nagpinget da iti panagorganisa iti laksid ti narimbaw a buteng ti adu nga estudyante.

“Talaga a takderan mi laengen daytoy ken talaga a saan mi nga inbati ti rebbengen a naiyatas kadakami,” kunana. Kunada ket nagbalin a tulbek iti panagbwelo da ti panagkalap ti nasasayaat a praktika manipud iti sabali a lugar ken panangiyannatop kadagitoy iti kapadasan da.

Nariing ni Ka Owen kadagiti parikut ti gimong idi nadamag na ti pammapatay ti militar ken Chad Booc, maysa a boluntir a manursuro kadagiti Lumad idiay Mindanao. Iti ad-adda a pannakaawat iti nakaro a pasismo ti estado, itay laeng nabiit ket nagiyebkas isuna a kayat na a makipagbiag iti yunit ti New People’s Army (NPA).

Mismo nga inikkan isuna ti inspirasyon ti kabagyan na a paset ti hukbo ti umili. “Idol ko ti NPA. Adun ti naam-ammok a kabataan a paset tatta ti hukbo ken ammok ti rason da. Ti estado mismon ti mangidurduron iti umili nga agarmas. Daytoy laeng ti pamuspusan tapno mabaliwan ti sistema,” kunana.

Naadaw iti Larab, rebolusyonaryo a pagiwarnak iti Eastern Visayas.