Bunga han kampanya han Migrante Manitoba ngan suporta han komunidad, madinaugon nga nahipakigbisog han 17 nga Pilipino nga mekaniko ha Winnipeg, Manitoba ha Canada an ira katungod ha seguridad ha trabaho. Gintanggal hira ha trabaho han 4Tracks Ltd hin waray ligal nga basaranan kahuman la han tulo kasemana ha kompaniya.

Narekrut an mga Pilipino nga mekaniko ha Pilipinas han Venture Management komo mekaniko han trak. Pag-abot ha Canada, ginpatuman hira han trabaho nga lahos ha ginkasarabutan ngan ha diri talwas nga kondisyon. Kalakip dinhi an pagpapatrabaho ha ira panahon han katyelo hin waray sadang nga proteksyon. Ginpagamit hira han mabubug-at nga mga higamit, kalakip an para sa pag-welding, hin waray tukma nga pagpapahiara o higamit. Ginpaukoy hira ha mga piguot nga kwarto, samtang an pira napiritan nga humigda ha salóg nga karton gud la an hanig. Nahiagum liwat hira han berbal nga pangabuso ngan panhadlok agud pugngan hira nga umato.

Ha US, madinaugon nga napugngan han Tanggol Migrante Movement an plano nga deportasyon kanda Kuya G hadton Disyembre 7, 2025 ngan Tita Rebecca hadton Enero 2. Mga Pilipino hira nga migrante nga igindetiner han Immigration and Customs Enforcement. Samtang nakapriso nahiagum hira han medikal nga pagpasibaya nga nagdurot han grabe nga sakit ngan kumplikasyon. Sigon ha mga doktor, delikado gud ha ira kalibsugan ngan posible mahingadto ha kamatayon kun igpipirit hira nga igbiyahe.