Pag-ato ha korap ngan pasista nga 2026 badyet. Nagprotesta an mga progresibo nga grupo ha Mendiola hadton Enero 5 agud suknaon an korap nga pasista nga 2026 badyet nga ginpirmahan ni Ferdinand Marcos Jr hito nga adlaw. Nagrali liwat hira hadton Disyembre 29, 2025 ha Kongreso ha Quezon City han papaspason an ratipikasyon han badyet. Putos an badyet han pork barrel, unprogrammed appropriations, confidential funds nga mga pondo para ha korapsyon ngan pasismo.

Kontra pribatisasyon ha Baguio City. Kahuman han pira kabulan nga pagtipa, napaatras han katawhan an plano nga pribatisasyon ngan “mallification” han pampubliko nga merkado ha Baguio City. Hadton Enero 3, igin-anunsyo han lokal nga gubyerno nga inatras an SM Prime Holdings Inc ha larang hini nga kuhaon an merkado. Ha Enero 9, nakatalaan nga pagbotosan han konseho han syudad an pribatisasyon han nasering nga merkado. Ginlalauman nga utro nga magrarali an mga grupo hito nga adlaw.

Pagtipa ha pagpapaserra han merkado ha Pasay City. Ginkundenar han masobra 200 nga parupaninda ngan masobra 500 nga trabahador, kargador, ngan drayber han traysikol an pagpapaserra ha Wowee Market ha Pasay City hadton Disyembre 19, 2025. Iginpaserra ini han lokal nga gubyerno tungod ha ginsesering nga panalapas ngan kakulangan han mga permit. Gatus-gatos an mawawarayan han pakabuhian, ngan mahihikawan han mas barato nga papliton an mga naglalaum dinhi nga residente.

Kontra-demolisyon ha komunidad ha Pasig City. Nanindugan an mga residente han Leona Compound ha Nagpayong, Barangay Pinagbuhatan, Pasig City hadton Enero 5 kontra ha pagpapaiwas han lokal nga gubyerno. Plano nga tindugan han ospital ngan eskoylahan an nasering nga lugar. Natipa an mga residente ha demolisyon labina nga waray nakatalaan nga pagbabalhinan nira.

Balik-Luneta han alyansa nga kontra korapsyon. Utro nga kinadto ha Luneta Park ha Manila an Kilusang Bayan Kontra Kurakot (KBKK) agud halaran han bukad ngan saludaran hi Dr. Jose Rizal ha anibersaryo han adlaw han iya kamatayon hadton Disyembre 30, 2025. An Luneta Park nagin testigos ha 100,000 katawo hadton Septyembre 21, 2025 ngan sobra 20,000 katawo hadton Nobyembre 30, 2025 ha pangunguna han KBKK ngan mga grupo ha ilarum hini.