Pakigbato sa korap kag pasista nga 2026 badyet. Nagprotesta ang mga progresibong grupo sa Mendiola sadtong Enero 5 agud batikuson ang korap kag pasista nga 2026 badyet nga ginpirmahan ni Ferdinand Marcos Jr sadtong adlaw mismo. Nagrali man sila sadtong Disyembre 29, 2025 sa Manubo nga Panalgan sang Kongreso sa Quezon City sang ginratsada ang ratipikasyon sang badyet. Puno ang badyet sang pork barrel, unprogrammed appropriations, confidential funds nga mga pondo para sa kurakot kag pasismo.

Kontra pribatisasyon sa Baguio City. Pagkatapos sang pila ka bulan nga pagpamatuk, napaatras sang pumuluyo ang plano nga pribatisasyon kag “mallification” sang pangpubliko nga merkado sa Baguio City. Sadtong Enero 3, gin-anunsyo sang lokal nga gobyerno nga nag-atras ang SM Prime Holding Inc sa plano sini nga kuhaon ang merkado. Sa Enero 9, natalana nga botohan sang konseho sang syudad ang pribatisasyon sang amo nga merkado. Ginasigahum nga liwat ma-rali ang mga grupo sa adlaw nga ini.

Pagpamatuk sa pagpsira sang merkado sa Pasay City. Ginkundenar sang masobra sa 200 ka manugtinda kag masobra 500 ka mamumugon, kargador, kag traysikol drayber ang pagpasira sa Wowee Market sa Pasay City sadtong Disyembre 19, 2025. Ginpasira ini sang lokal nga gobyerno tungod sa ginasiling nga mga paglapas kag kakulangan sang mga permit. Ginatos ang mawad-an sang palangabuhian, kag madingutan sang mas barato nga balaklon ang mga nagasalig diri nga mga residente.

Kontra-demolisyon sa komunidad sa Pasig City. Nagpanindugan ang mga residente sang Leona Compound sa Nagpayong, Barangay Pinagbuhatan, Pasig City sadtong Enero 5 batuk sa pagpalayas sang lokal nga gobyerno. Plano nga tukuran sang ospital kag eskwelahan ang amo nga lugar. Nagapamatuk ang mga residente sa demolisyon ilabi na nga wala sang natalana nga sayluhan sa ila.

Balik-Luneta sang alyansa kontra korapsyon. Liwat nga nagpadulong sa Luneta Park sa Manila ang Kilusang Bayan Kontra Kurakot (KBKK) agud halaran sang bulak kag hatagan sang pagsaludo si Dr. Jose Rizal sa anibersaryo sang adlaw sang iya kamatayon sadtong Disyembre 30, 2025. Ang Luneta Park nangin saksi sa protesta kontra korapsyon sang 100,000 ka tawo sadtong Septyembre 21, 2025 kag masobra 20,000 ka tawo sadtong Nobyembre 30, 2025 sa pagpanguna sang KBKK kag mga grupo sa idalum sini.