Bunga sang kampanya sang Migrante Manitoba kag suporta sang komunidad, madinalag-on nga naaway sang 17 ka Pilipinong mekaniko sa Winnipeg, Manitoba sa Canada ang ila kinamatarung sa seguridad sa trabaho. Ginkakas sila sa trabaho sang 4Tracks Ltd nga wala sang ligal nga rason pagkatapos lang sang tatlo ka semana sa kumpaniya.

Narekrut ang mga Pilipinong mekaniko sa Pilipinas sang Venture Management bilang mekaniko sang trak. Pag-abot sa Canada, ginpatungod sila sang trabaho lapaw sa nakasugtanan kag indi luwas nga kondisyon. Lakip diri ang pagpatrabaho sa ila sa panahon sang tigtugnaw nga wala sang bastante nga proteksyon. Ginpagamit sila sang mga mabug-at nga kasangkapan, lakip ang para sa pag-welding, nga wala sang nagakaigo nga paghanas ukon kagamitan. Ginpapuyo sila sa mapiot nga kwarto, samtang ang pila napilitan nga sa salog na maghigda nga karton lang ang banig. Nakaagum man sila sang berbal nga pagpang-abuso kag pagpanghadlok agud punggan sila nga magbato.

Sa US, madinalag-on nga napunggan sang Tanggol Migrante Movement ang plano nga deportasyon nanday Kuya G sadtong Disyembre 7, 2025 kag Tita Rebecca sadtong Enero 2. Sila mga Pilipino nga imigrante nga gindetener sang Immigration and Customs Enforcement. Samtang nabilanggo nakaagum sila sang medikal nga pagpabaya nga nagtuga sang grabe nga ginbatyag kag kumplikasyon sa balatian. Suno sa mga doktor, tuman ka delikado sa ila ikaayong-lawas kag pwede nga magdangat sa kamatayon kon piliton sila nga ibyahe.