Patarasak ang Armed Forces of the Philippines (AFP) kag ang Philippine National Police (PNP) sa pagsabwag sang terorismo kag pag-atake sa mga komunidad kag pumuluyo bisan sa panahon sang Paskwa kag Bag-ong Tuig. Antes natapos ang 2025, nalista ang mga kaso sang pagpatay, pag-abdak, pag-aresto kag iban pa nga paglapas sa tawhanon nga kinamatarung.

Pagpatay. Gintiro sa malapitan sang mga tinawo sang AFP ang babaye nga lider-mangunguma nga si Warlita Jimenez, 55, sa Sityo Makilo, Barangay Camansi, Kabankalan City sa Negros Occidental sadtong Disyembre 23, 2025. Ang biktima asawa sang lider-mangunguma nga si Joseph Jimenez nga ginpatay sang 15th IB sadtong Nobyembre 30, 2022.

Pag-abdak. Gin-abdak sang mga pwersa sang estado ang tinawo sang National Democratic Front-Cagayan Valley (NDF-CV) nga si Scarlet Lyne Gayo. Ulihi nga nakita si Gayo sa Cavite sadtong Disyembre 9, 2025 kag indi pa gihapon makontak tubtob subong. Nagakabalaka ang NDF-CV sa kaluwasan kag kabuhi ni Gayo.

Pag-aresto. Sa Occidental Mindoro, gin-aresto sang gin-isa nga pwersa sang mga pulis kag 76th IB si Ramon “Monet” Alcantara sa Barangay San Vicente, Abra de Ilog sadtong Disyembre 23, 2025. Ginapasibangdan siya nga imbolbado sa isa ka engkwentro sang 76th IB kag BHB. Si Alcantara aktibo nga nagapamatuk sa pagmina sa Mindoro kag nagasulong sang kinamatarung sang mga tumandok nga Mangyan para sa ila duta nga ginpanubli. Nagdalagan siya sa pagka-meyor sang Abra de Ilog sadtong eleksyon 2022.

Sa Baguio City, gin-aresto sang mga pulis ang tagpamaba sang Kilusang Mayo Uno-Cordillera nga si Mike Cabangon sadtong Disyembre 27, 2025. Nagaatubang siya sa kaso nga “terorrism financing.” Nahilway siya pagkatapos magpyansa.

Sa Manila, liwat nga gin-aresto sang mga pulis sadtong Disyembre 18, 2025 si Ryan Ombrog sa kaso nga pagpangsunog. Si Ombrog lakip sa masobra 270 nga gin-aresto matapos ang protesta kontra korapsyon sadtong Septyembre 21,2025.

Pagpaniro. Sa Leyte, nagreklamo sadtong Disyembre 2025 ang mga residente sang Barangay Villa Corazon, Burauen sa pasulit-sulit nga patarasak nga pagpaniro sang CAFGU (Citizen Armed Force Geographical Unit) sa komunidad. Pila ka beses na kuno nga gulpi-gulpi nga nagapalupok ang mga ini sa ila kampo sa tunga-tunga sang gab-i ukon kaagahon. Ginakabalak-an man sang mga residente ang paghinubog sang mga tinawo sang CAFGU sa mismo kampo militar.

Pagpang-ipit. Pila ka adlaw antes ang pagsaulog sang Paskwa, gindumog kag naglunsar sang wala-untat nga atake ang 62nd IB sa mga komunidad sa Guihulngan City kag Moises Padilla sa Negros. Sa sulod sang 10 ka adlaw halin Disyembre 13, 2025 nagpatigayon ang mga elemento sini sang iligal nga pagsulod kag pagpangbaluskay sa mga balay, pagpanghadlok kag pagpamahog, kag pagpatay sa karabaw.