Pamatuod ang mga pagsaulog sa pungsod kag luwas sang pungsod sa ika-57 nga anibersaryo sang Partido Komunista ng Pilipinas (PKP) sang padayon nga pagpanikasog sang bug-os nga rebolusyonaryong kahublagan. Dako nga tampa sa nawong sang rehimen US-Marcos nga sa lain-lain nga lugar ginawagayway ang pula nga bandera nga may bulawan nga maso kag karit agud hatagan sang pagsaludo ang halos anum na ka dekada nga pagpamuno sang Partido sa demokratikong rebolusyon sang banwa sa Pilipinas.

Ang mga pagsaulog ginlunsar sang mga sanga kag komite sang Partido, mga yunit sang Bagong Hukbong Bayan (BHB) kag mga tsapter kag alyado nga organisasyon sang National Democratic Front (NDF). Samtang, nagpadangat man sang pagtamyaw sa PKP ang mga partido kag organisasyon halin sa iban nga pungsod.

Sa mga pagtililipon, nangin unod ang pagtalakay sa mensahe sang Komite Sentral sang Partido para sa anibersaryo. Ginpasidunggan man sa mga aktibidad nga ini ang mga martir sang pumuluyo sa nagligad nga mga dekada.

Sa mga larangan gerilya, nagpasundayag sang armas ang mga Pulang hangaway sang BHB agud saluduhan ang Partido, bisan pa padayon ang operasyon kombat sang Armed Forces of the Philippines (AFP). Ginreport ang mga pagsaulog sang BHB sa Cagayan Valley, Southern Tagalog, Negros Island, Eastern Visayas, kag North Central Mindanao. Magapadayon sa masunod nga mga inadlaw ang mga aktibidad sang lain-lain pa nga yunit.

Sa Southern Tagalog, ginlunsar sang BHB sa mga larangan gerilya sa Batangas, Quezon kag Isla sang Mindoro ang mga serye sang pagtililipon. Separado nga pagsaulog ang ginlunsar sa mga isla sang Samar kag Leyte, sa Eastern Visayas. Sa North Central Mindanao, gingamit nga higayon ang pagsaulog agud konsolidahon ang mga Pulang hangaway kag makalunsar sang programa pangkultura. Malapit na tungang-gab-i sang matapos ang aktibidad.

Suno sa mga report, makita sa mga Pulang hangaway ang nangin positibo nga epekto sang pagtuon sa pahayag sang Komite Sentral. Nakabulig kuno ini agud isikway ang mga bagahe nga nagapabug-at kag nagapahinay sa signipikante nga pag-uswag sang ila matag-hilikuton. Sa mga okasyon nga ini, hugot nga ginpatuman sang BHB ang untat-lupok nga ginmando sang Komite Sentral sa gintalana nga mga adlaw.

Sa mga sentrong syudad kag kabanwahanan, naglunsar sang mga martsa, likom nga pagtililipon, operasyon pinta kag operasyon dikit (OP-OD) kag iban pa nga aktibidad ang mga tsapter kag alyado sang NDF. Nagsugod ang mga ini sadtong ikatatlo nga semana sang Disyembre 2025 kag nagpadayon tubtob sining Enero.

Sa Metro Manila, sunod-sunod nga martsa ang ginlunsar sa Manila kag Pasay City sadtong Disyembre 21 kag 22, 2025. Kalakip sa mga grupo nga nagpakigbahin sa protesta ang Kabataang Makabayan (KM), Artista at Manunulat ng Sambayanan (Armas), Makabayang Kilusan ng Bagong Kababaihan (Makibaka), Revolutionary Council of Trade Unions, Makabayang Kawaning Pilipino kag Compatriots.

Sa Central Luzon, natigayon ang pagtilipon sadtong Disyembre 26, 2025 sa isa ka indi matumod nga lokasyon. Sa Rizal, ginlunsar sang NDF ang pagtipon sadtong Disyembre 30, 2025 nga ginsundan sang pagsab-it sang duha ka higante nga balatengga sadtong Enero 2 sa Antipolo City.

Sa pagpanguna sang Compatriots Philippines, masobra sa 100 ka tawo ang nagtambong sa isa ka programa pang-kultura sa isa ka lokasyon sa Southern Tagalog. Nagtambong diri ang mga myembro sang grupo halin sa Rizal, Bulacan, kag Metro Manila, kag mga himata sang mga martir sang pumuluyo. Pila ka adlaw antes sini, nagsab-it sang mga balatengga ang grupo sa mga kadalanan sang Commonwealth Avenue sa Quezon City.

Sa Australia, naglunsar sang pagtilipon kag operasyon-dikit ang Compatriots-NDFP-Australia kag Compatriots-KM-Narmm. Masobra 300 man ang nagpakigbahin sa online broadcast sang NDF International Office agud basahon ang pahayag sang Komite Sentral.

“Ang pagpanikasog kag dedikasyon [sang Partido] nga tungdan ang makasaysayan nga katungdanan sa pagpasulong sang kawsa sang pumuluyo naghatag sang inspirasyon kag padayon nga nagahatag sang inspirasyon sa masa nga magbangon,” siling ni Ka Elias Dipasupil, heneral nga sekretaryo sang NDF. Dugang niya, mas nga napabaskog sang Partido ang pagpamuno sini sa masang Pilipino sa pagpanikasog sa subong nga kahublagan panadlong.

Madamo nga iban pa nga tsapter kag alyado sang NDF ang nagpaguwa sang pahayag para sa anibersaryo sang Partido.