Madinalag-on nga ginsaulog sa sulod sang mga sonang gerilya sang Mindoro ang ika-57 nga anibersaryo sang Partido Komunista ng Pilipinas (PKP) sa tunga sang wala-puas nga operasyon sang mga tropa sang 203rd IBde kag pulis. Sa pagpanguna sang mga yunit sang Bagong Hukbong Bayan-Mindoro (Lucio de Guzman Command), nalunsar ang mga pulong anibersaryo sa tema sang pahayag sang Komite Sentral nga “Tuman ka paborable sang sitwasyon para labi nga isulong ang demokratikong rebolusyon sang banwa.”

Sa bug-os nga 2025, ginpakig-awayan sang BHB-Mindoro kag pumuluyong Mindoreño ang masingki nga kontra-rebolusyonaryo nga gyera sa isla. Pila ka beses nga gindeklarar sang 203rd IBde kag bisan sang 2nd ID nga dugmukon sini ang rebolusyonaryong kahublagan sa Mindoro sadtong 2025.

Ginbalikan sang mga rebolusyonaryong pwersa ang mga maduagon nga kasaysayan sang Partido kag ang madinalag-on nga pagpamuno sini sa rebolusyon Pilipino sa sulod sang 57 ka tuig. Sa isa ka pahayag, gin-report sang tagpamaba sang BHB-Mindoro nga si Ka Madaay Gasic nga sa espirito sang pagpanadlong kag giya sang Partido nalab-ot sang yunit kag liwat nahulagan ang 84% sang mga banwa sa isla kag signipikante nga isip sang mga baryo.

Pulong pagsaulog

Gintalakay sa ginpatigayon nga mga pulong anibersaryo ang pangkalibutanon kag pungsodnon nga sitwasyon, kasaysayan sang Partido, mga estorya sang kadalag-an sang rebolusyon agraryo sa Mindoro, kag ang mga hangkat, panawagan kag gilayon nga katungdanan para sa pagpabaskog sang rebolusyonaryong kahublagan.

Ginhatagan sang duag ang mga pulong nga ini sang mga pang-kultura nga pagpasundayag kasubong sang kanta-saot sang “Ang Gabay,” balagtasan nga “Ang Tunay na Hukbo ng Mamamayan,” palagwaon nga nagapakita sang adlaw-adlaw nga paghimakas sang masa kag paghakos nila sa rebolusyon kag ang dungan nga pagsaot sa kanta nga “Kun Walay BHB.”

Ginpasidunggan man sa mga programa ang mga martir sang rebolusyon Pilipino lakip ang mga bag-ong mga baganihan nga naghalad sang ila kabuhi sadtong nagligad nga tuig.

Nagtambong sa mga pagsaulog ang mga masang mangunguma kag tumandok nga Mangyan, mga lokal nga aktibistang masa, kag mga nagbisita halin sa syudad.

Isa ka bulan nga paghanda

Bug-os nga bulan sang Disyembre, ginsaulog sang mga rebolusyonaryong pwersa ang anibersaryo sang Partido. Sa mga yunit sang BHB, may pauna nga mga aktibidad kaangay sang mga pang-kultura nga aktibidad kag semana nga kapehan. Mismo sadtong Disyembre 26, 2025, ginpatigayon ang pagpasundayag sang bandera sang Partido kaupod ang masa.

Bilang pagpasanto sa sitwasyon militar kag masako nga iskedyul sang produksyon,ginhimo sang mga yunit ang plano para sa mga kalit kag ginagmay nga mga pulong anibersaryo nga ginalunsar san-o man kag kon diin man libre ang taga-baryo. May isa ka yunit nga naglunsar sang pulong anibersaryo sa naagihan nga balay samtang nagapanglakaton halin sa isa ka dako nga pagtililipon. Natukod diri ang lokal nga organisasyon masa.

Naghatag man ang isa pa ka yunit sang BHB sang paghanas sa mga residente sa isa ka militarisadong lugar. Sabat ini sa demanda nila nga may ikasarang nga depensahan ang ila kaugalingon batuk sa naga-operasyon nga mga soldado kag mga ahente sang paniktik nga masami yara sa erya.

Paghakos sang masa sa rebolusyonaryong handum

Indi mangin madinalag-on ang bug-os nga bulan nga pagsaulog sang anibersaryo sang Partido kon wala ang mainit kag bug-os taguipusoon nga pagsuporta sang masa sa kawsa sang Partido. Ginsakdag nila ang mga aktibidad halin sa pagluto sang mga handa, pagsag-ob, pagpaseguro sang seguridad, pagdul-ong kag pagsugat sa mga nagbisita sa sonang gerilya kag aktwal nga pagtambong sa programa.

“Indi mapaseguro ang kadalag-an sang rebolusyon kon indi mangin makahas sa hilikuton masa,” pahayag ni Ka Ruffa, kagawad sang isa ka yunit sang BHB. Malipayon nga ginsalu-saluhan sang taga-baryo kag hukbo ang gamay nga handa nga karne sang manok, pansit, ispageti kag biko.

“Nagdesisyon ako nga padugayon ang pagpangabuhi ko sa yunit tungod napukaw ako sa bug-os taguipusoon nga dedikasyon sang Hukbo sa pag-organisa kag pagpauswag sa kabuhi sang masa,” suno kay Ka Elias, isa ka pamatan-on nga nagbisita.