Sadto mismo sang Enero 3, adlaw sang armado nga paglusob sang pwersang militar sang US sa Venezuela, kag pag-abdak sa presidente sini nga si Nicolas Maduro, kag sa iya asawa nga si Celia Flores, nagbaha sa kadalanan ang naga-ibwal nga pumuluyong Venezuelan. Ginbatikos nila ang atake sa ila sobereniya kag ginagiit ang gilayon nga pagbalik sang ila presidente kag first lady.

“Ang katuyuan sang atake nga ini wala sang iban kundi ang agawon ang estratehikong rekurso sang Venezuela, partikular ang lana kag mga mineral, sa pagtilaw nga wasakon ang independensya sa pulitika sang pungsod. Indi sila magmadinalag-on,” suno sa gobyerno sang Venezuela sa una nga opisyal nga pahayag sini pagkatapos ang agresyon. Hugot sini nga ginasikway kag ginapakamalaut ang agresyon militar nga nag-target sa teritoryo kag lain-lain nga sibilyan kag militar nga pasilidad sa pungsod. Masobra 80 ka Venezuelan ang nareport nga napatay sa pagpang-atake.

Pila ka oras pagkatapos ang pag-abdak, bug-os pagpahambog nga gindeklarar ni Donald Trump nga ang US na ang “magapadalagan” sang Venezuela, lakip ang malagpad nga rekurso sini sa lana. Ang pagkakas kay Maduro lubos nga ginsuportahan sang sakon sa lana kag rekurso nga mga pungsod sa European Union, subong man ang Japan, Australia kag iban pa nga mga tuta nga estado sang US. Gilayon sila nga nagpanawagan sang “malinong nga transisyon” agud papungkuon ang isa ka papet nga estado nga magabukas sa Venezuela sa pagpangkawkaw sang mga dalagko nga kumpaniya sa lana. Ginsuportahan man ini sang mga sosyal-demokrata nga grupo nga nagapakuno-kuno nga kontra agresyon apang naga-koros sa paghatag-rason sa pag-abdak kay Maduro.

Ginbatikos sang Partido Komunista ng Pilipinas ang agresyon militar sang imperyalismong US sa Venezuela. Gintawag sini nga “buang nga pasista” si Trump sa pagmando sang paglusob sa Venezuela. Siling sang Partido, segurado nga sindihan sini ang patriyotiko nga kaakig sang pumuluyo sang Venezuela.

Indi malutos nga panindugan

“¡Maduro, aguanta, que el pueblo se levanta!” (Maduro, kapit lang, naga-alsa ang pumuluyo) ang singgit sang mga Venezuelan sa kadalanan. Ginatos ka libo ang nagbaha sa Caracas kag iban nga bahin sang pungsod agud ipahayag ang ila suporta kag ipadangat ang ila pagpalangga kay Maduro kag kay Flores, ang ginatawag nga “una nga kombatant” sang pungsod. Nagsunog sila sang mga bandera sang US.

“Kabay mahangpan sang mga ekstremista nga ang mga bomba nga ginpangayo nila (sa US) nagpatay kag magapatay sa tanan nga mga Venezuelan, Chavista man ukon indi,” pahayag sang isa ka raliyista. Ang mga “ekstremista” nga gintumod niya amo ang mga partido nga ginapondohan sang US nga ginapamunuan sang mga tawo-tawo sini nga si Maria Machado. Madugay na nga ginapangayo ni Machado nga salakayon sang US ang Venezuela para pukanon ang gobyernong Maduro kag papungkuon siya kag iya mga kahimbon sa estado. Bisan sa amo sini, wala siya ginpwesto ni Trump. Labi nga ginakangil-aran si Machado sang iya mga kasimanwa.

Sadtong Enero 4, nagsumpa bilang temporaryo nga presidente si Delcy Rodriguez, bise presidente sang Venezuela, santo sa konstitusyon sang pungsod. Ginpahulag man sang armadong kusog ang malapad nga milisya nga gintukod sini para sa depensa sang pungsod.

Internasyunal nga suporta

Madasig kag hugot ang pagkundenar sa agresyon sang US kag pag-abdak kanday Maduro kag Flores sa Latin America, Africa kag iban pa nga mga pungsod. Gilayon nga nagtindog para kay Maduro kag sa Venezuela ang Cuba, Nicaragua kag Colombia. Nagpahayag naman sang hugot nga pagpamatuk ang Brazil, Uruguay kag Mexico sa ginhimo nga pagpangsalakay. Ginakabig nila ang agresyon bilang atake indi lang sa Venezuela kundi sa bug-os nga Latin America kag mga pungsod nga nagapakig-away sa imperyalistang hegemoniya sang US. Sa mga pungsod nga ini, nagbaha ang mga pumuluyo sa kadalanan para suportahan ang mga Venezuelan.

May kadungan nga mga rali sa atubang sang mga embahada sang US sa Germany, Spain, Belgium, France, Greece kag Turkey. Sa sulod sang US, ginbatikos sang mga Amerikano ang agresyon sang kaugalingon nila nga gobyerno sa mga hublag sa guwa sang White House, sa New York (kon diin gindala si Maduro) kag pila pa ka syudad.

Sa Pilipinas, nagmartsa padulong sa embahada sang US sa Manila ang mga progresibong grupo sa pagpanguna sang Bagong Alyansang Makabayan kag Philippine-Bolivarian Venezuela Friendship Association sadtong Enero 5. Ginkundenar nila ang agresyon sang US kag naghatag sila sang suporta sa pumuluyong Venezuelan kag ila gobyerno.