“Indi matarong kag indi mabaton” ang kumpirmasyon sang Court of Appeals (CA) sa pamatbat sang korte batuk sa Talaingod 13, suno sa mga grupo nga tagpangapin sang mga kinamatarung sang mga minorya, mga tawhanon nga kinamatarung, abogado kag iban pa. Ang Talaingod 13 ginpamatbatan sang korte sa kaso nga “child abuse” sadtong Hulyo 15, 2024. Ginkumpirma ang pamatbat nga ini sang CA sa Cagayan de Oro sadtong Disyembre 16. Sadtong Enero 6, nagpasaka sang motion for reconsideration sa CA ang Talaingod 13 agud hangkaton ang kumpirmasyon nga ini.

Ang Talaingod 13 mga myembro sang delegasyon nga nagbulig sa mga manunudlo kag estudyante nga Lumad sa Talaingod, Davao del Norte sadtong Nobyembre 28, 2018. Ginabug-os ini nanday Bayan Muna Rep. Satur Ocampo, ACT Teachers Rep. France Castro, Ma. Eugenia Victoria Nolasco kag siyam pa nga sadto mga manunudlo.

Suno sa mga tumandok, ang indi matarong nga desisyon batuk sa Talaingod 13 direkta nga atake mismo sa ila. Ini kabahin sang mas malapad nga estratehiya sang estado agud pahipuson ang mga nagasuporta sa away sang mga tumandok.

“Wala sang bata kag wala sang ginikanan nga nagreklamo. Wala sang kahalitan nga napamatud-an, apang ginpamatbatan ang mga manunudlo,” suno kay anay Rep. Eufemia Cullamat.