Panugod pa lang sang tuig, nag-arangkada na ang makinaryang pang-gyera sang imperyalismong US, sa pagpanguna sang buang nga pasista nga si Donald Trump, presidente sang US. Sadtong Enero 3, dulungan nga ginbomba sini ang Caracas, sentro nga syudad sang Venezuela, kag iban nga katambi nga rehiyon, kag ginpatigayon ang operasyon militar agud abdakon si President Nicolas Maduro kag asawa niya nga si Cilia Flores para pwersahon nga dal-on sila sa US.

Kon ano-ano ang ginhimo-himo ni Trump nga pasibangod kontra kay Maduro, kaangay sang gin-imbento nga “drug cartel” nga iya kuno ginapamunuan, agud hatagan sang rason ang direkta nga iligal nga operasyon. Apang kahibalo ang bug-os nga kalibutan sang matuod nga kabangdanan: ang lana sang Venezuela nga ginalawayan kag ginaangkon ni Trump nga “ila.” Gin-ako man ini ni Trump, sang nag-deklarar nga “padalaganon namon ang Venezuela kag kontrolon ang iya lana.”

Hayagan nga armadong agresyon para sa pagpangkawkaw ang pagsalakay sang imperyalismong hurong sa pungsod nga nagapangapin sang iya kahilwayan. Pagkatapos nga abdakon si President Maduro, ginapahog naman subong ni Trump ang nagbulos nga si Delcy Rodriguez, agud pwersahon nga magsunod sa iya nga dikta. Nagahiliusa subong ang pumuluyo sang Venezuela sa pagpanindugan kag pakig-away. Sa kadalanan, nagahiliusa nga singgit nila, “Ibalik sa amon si Maduro!”

Lapnagon man nga ginbatikos sang madamo nga pungsod ang pagpangsalakay sang US tungod sa paglapas sini sa mga internasyunal nga layi kag pagsulundan sang United Nations. Nagpahayag sang “pagkabalaka” bisan ang mga kasubong kag alyado nga imperyalista sang US, bisan ginpili nila nga indi magpasilabot. May yara man mga grupo nga maka-US nga “nagakahangawa” sa agresyon sang US, apang hipos nga nagapalakpak man sa pag-abdak sang US sa kontra-imperyalistang si Maduro.

Ang agresyon militar sang US sa Venezuela indi amo ang pinakauna, kag pat-od nga indi katapusan nga paglapak sini sa mga hilway nga pungsod sa lain-lain nga bahin sang kalibutan. Halin sang natapos ang Ikaduha nga Inaway Pangkalibutanon, ang US nagpanakop, nanglusob, nagpasilabot, nagpatay sa mga lider, nagkudeta, nagpapungko kag nagsuporta sa mga maka-US nga pasistang diktadurya nga indi magnubo sa 30 ka pungsod, kadam-an sa Latin America, pati na sa Asia lakip ang Middle East. Ginapaandaman man subong sang US ang Iran, nga kasubong sang Venezuela, manggaranon sa lana, kag ginpili nga i-nasyunalisa ini. Ginapaandaman man sang pasistang buang ang Mexico, Canada, kag Greenland.

Sa idalum sang bag-o nga ginpirmahan nga National Security Strategy (NSS) ni Trump, gindeklarar sini ang plano nga himuon nga “pinakagamhanan kag pinakamakamamatay” ang pwersang militar sang US. Gindeklarar ni Trump ang plano nga pagkudal sa Latin America, nga ginakabig nila nga “amon ugsaran.” Isa ini ka peligro batuk sa Cuba, Colombia, Brazil kag iban pa nga pungsod nga nagatib-ong sang ila kinamatarung sa kaugalingon nga pagbuot.

Ang direkta nga pagsalakay sang US sa Venezuela bag-o nga lebel sang paglala sang pasistang terorismo sang US, sa atubang sang nagasingki nga imperyalistang kontradiksyon. Ginapakita sang pasistang Trump nga wala sang layi ang makaupang sa iya kabuangan. Sobra ang pagkabalaka sang mga karibal kag alyado sang US nga gamiton ang lana sang Venezuela bilang hinganiban pangpulitika kag pang-ekonomiya batuk sa ila sa dagway sang pag-impluwensya sa pangkalibutanon nga suplay kag presyo.

Sa pagapanguna sang US, nagadako nga nagadako subong ang ginatalana nga pondo sa gasto militar. Nagsulod na sa bag-o nga lebel sang militarisasyon ang imperyalistang Japan sa pagbubo sini sang wala pa sang tupong nga kadakuon sang pondo sa produksyon militar. Nagadako man ang gasto militar sang mga imperyalistang pungsod sa Europe. Kaupod man sang US sa NATO, ang France kag Germany nagapamatuk sa ginaduso sang US nga kasugtanan sa Ukraine, tungod sobra-sobra ang ginahatag sini nga kontrol sa US sa rekurso sang pungsod, sa disbentaha sang mga imperyalista sa Europe.

Patimaan sang nagadalum nga krisis sang imperyalismo ang nagasingki nga pag-agaway sang pinakadalagko nga gahum para sa kuluhaan sang barato nga hilaw nga materyales, kag matambakan sang sobra nga kapital sa dagway sang pagpautang kag pangapital. Inagaway sa teritoryo ang rason sang nagalupok nga mga inaway sa lain-lain nga bahin sa kalibutan, halin sa gyerang proksi sang US sa Ukraine batuk sa Russia, pagdugmok sang US kag Zionistang Israel sa Gaza, pag-agaw sang mga imperyalista sa Syria, pagpangbomba sang US sa Yemen kag Somalia, kag pakig-gitgitan sang US sa China sa South China Sea.

Sa sini nga konteksto, lubos nga mahangpan ang nagadako nga presensya sang mga pwersang militar sang US sa Pilipinas, ang pagdamo sang mga base militar sini sa lain-lain nga bahin sang pungsod, ang pagtambak sang mga mabaskog nga armas, ang permanente nga pagpalawod sang mga pwersang nabal sini sa kadagatan sang pungsod, ang wala untat nga mga ehersisyong militar kag pagpanulsol sang kagamo sa Taiwan. Gintukod sang US ang Task Force Philippines agud pahugton ang kontrol sini sa Armed Forces of the Philippines kag palig-unon ang mayor nga haligi sang paghari sini sa Pilipinas. Sa masunod nga lima ka tuig, plano sang US nga magbubo sang $2.5 bilyon nga ayuda militar tubtob 2030.

Tanan nga ini wala sang kahilabtanan sa “pagpangibabaw sang layi” ukon “kahilwayan sa pagpalawod” sa kadagatan. Pagkatapos sang ginpakita sang US sa Venezuela nga pagtapak sa mga pangkalibutanon nga mga pagsulundan, mga buang kag bulag nga papet sang US na lang (ang AFP, si Marcos, kag mga grupo kasubong sang Akbayan) ang nagapalakpak sa pagpostura sang US nga pulis sa South China Sea.

Labi nga wala sang kahilabtanan ang presensya sang US sa ginapabula nga pagpangapin sa kahilwayan sang Pilipinas. Taliw-as diri, ang nagadamo nga soldado nga Amerikano kag iban pa nga dala sini nga dumuluong nga tropa sa Pilipinas ang pinakadako nga pagtapak sa sobereniya sang pungsod. Wala lang ginagamit sang US ang pungsod para sa iya imperyalistang interes, ginaguyod man sini ang Pilipinas sa gyera nga taliw-as sa kaayuhan sang pungsod. Pinakadako sini ang AFP agud magserbe ini nga kabulig sa pag-ipit sa pumuluyo nga nagapakig-away.

Sa atubang sang nagasingki nga imperyalistang kagamo, agresyon militar, pasismo kag pagpangsulsol sang gyera sang imperyalismong US, dapat paigtingon sang pumuluyong Pilipino ang ila paghimakas para sa matuod nga kahilwayan kag demokrasya. Kadungan sini, dapat makig-isa ang pinakalapad nga kubay sang pumuluyo sa bug-os nga kalibutan agud upangan ang pag-arangkada sang gyera kag pasismo sa bug-os nga kalibutan.