Walay puas ang Armed Forces of the Philippines (AFP) ug ang Philippine National Police (PNP) sa pagsabwag og terorismo ug pag-atake sa mga komunidad ug katawhan bisan atol sa Pasko ug Bag-ong Tuig. Ayha nahuman ang 2025, nataho ang mga kaso sa pagpatay, pagdagit, pag-aresto ug uban pang paglapas sa tawhanong katungod.

Pagpatay. Dul-it nga gipusil sa mga ginsakpan sa AFP ang babayeng lider-mag-uuma nga si Warlita Jimenez, 55, sa Sityo Makilo, Barangay Camansi, Kabankalan City sa Negros Occidental niadtong Disyembre 23, 2025. Ang biktima mao ang asawa sa lider-mag-uumang si Joseph Jimenez nga gipatay sa 15th IB niadtong Nobyembre 30, 2022.

Pagdagit. Gidagit sa mga pwersa sa estado ang ginsakpan sa National Democratic Front-Cagayan Valley (NDF-CV) nga si Scarlet Lyne Gayo. Ulahing nakita si Gayo sa Cavite niadtong Disyembre 9, 2025 ug wala pa gihapon makontak hangtud sa kasamtangan. Nabalaka ang NDF-CV sa kaluwasan ug kinabuhi ni Gayo.

Pag-aresto. Sa Occidental Mindoro, giaresto sa giusang pwersa sa mga pulis ug 76th IB si Ramon “Monet” Alcantara sa Barangay San Vicente, Abra de Ilog niadtong Disyembre 23, 2025. Giakusahan siyang nalambigit sa usa ka engkwentro sa 76th IB ug BHB. Si Alcantara usa ka aktibong nagababag sa pagmina sa Mindoro ug nanalipud sa katungod sa mga Mangyan alang sa ilang yutang kabilin. Midagan siya sa pagka-meyor sa Abra de Ilog niadtong eleksyong 2022.

Sa Baguio City, giaresto sa mga pulis ang tigpamaba sa Kilusang Mayo Uno-Cordillera nga si Mike Cabangon niadtong Disyembre 27, 2025. Nag-atubang siya og kasong “terorrism financing.” Nakagawas siya human magpyansa.

Sa Maynila, subling giaresto sa mga pulis niadtong Disyembre 18, 2025 si Ryan Ombrog sa kasong pagpanunog. Si Ombrog lakip sa kapin 270 ka giaresto human ang protesta kontra korapsyon niadtong Setyembre 21, 2025.

Pagpamusil. Sa Leyte, nagreklamo niadtong Disyembre 2025 ang mga residente sa Barangay Villa Corazon, Burauen sa balik-balik nga paturagas nga pagpamusil sa CAFGU (Citizen Armed Force Geographical Unit) sa komunidad. Pipila ka beses na kunong kalit na lang nga nagpabuto sa ilang kampo sa tungang gabii o kaadlawon. Gikabalaka usab sa mga residente ang paghubog-hubog sa mga ginsakpan sa CAFGU sa mismong kampo militar.

Pagpamig-ot. Pipila ka adlaw ayha ang pagsaulog sa Pasko, gidumog ug naglunsad og walay hunong nga atake ang 62nd IB sa mga komunidad sa Guihulngan City ug Moises Padilla sa isla sa Negros. Sulod sa 10 ka adlaw gikan Disyembre 13, 2025, ang mga elemento niini iligal nga nagpabuto ug nangutingkay sa mga balay, nanghadlok ug nanghulga, ug mipatay sa usa ka kabaw.