Niadto mismong Enero 3, adlaw sa armadong pag-atake sa pwersang militar sa US sa Venezuela, ug pagdagit sa presidente niini nga si Nicolas Maduro, ug sa iyang asawa nga si Cilia Flores, midagsang sa kadalanan ang nagaalsang katawhang Venezuelan. Gimakmak nila ang atake sa ilang soberanya ug giduso ang hinanali nga pagbalik sa ilang presidente ug unang ginang (first lady).

“Ang tumong sa maong atake walay lain kundili ilugon ang estratehikong mga rekurso sa Venezuela, partikular ang lana ug mga mineral, sa pagsulay nga pukanon ang independensya sa pulitika sa nasud. Dili sila molampos,” matud sa gubyernong Venezuelan sa unang upisyal nga pamahayag niini human ang agresyon. Kusganon niining gisalikway ug gikundena ang agresyong militar nga mitarget sa teritoryo ug lain-laing sibilyan ug militar nga pasilidad sa nasud. Kapin 80 ka Venezuelan ang natahong napatay sa pagpangatake.

Pipila ka oras human ang pagdagit, hambog nga gideklara ni Donald Trump nga ang US na ang “magapadagan” sa Venezuela, lakip ang abundang rekurso niini sa lana. Ang pagtangtang kang Maduro hingpit nga gisuportahan sa hakog sa lana ug rekurso nga mga nasud sa European Union, ingonman sa Japan, Australia ug uban pang mga tutang estado sa US. Paspas silang nanawagan sa “malinawong transisyon” aron ituboy ang usa ka papet nga estado nga mag-abli sa Venezuela sa pagpangawkaw sa dagkung kumpanya sa lana. Gisuportahan usab kini sa mga sosyal demokratang grupong nagpakaaron-ingnong kontra sa agresyon apan nakikoro sa paghatag rason sa pagdagit kang Maduro.

Gimakmak sa Partido Komunista ng Pilipinas ang agresyong militar sa imperyalismong US sa Venezuela. Gitawag niining “hungog nga pasista” si Trump sa pagmando sa pag-atake sa Venezuela. Matud sa Partido, siguradong silaban niini ang patriyotikong kasilag sa katawhan sa Venezuela.

Dili mabuntog nga baruganan

“¡Maduro, aguanta, que el pueblo se levanta!” (Maduro, lahutay, katawhan misukol!) ang singgit sa mga Venezuelan sa kalsada. Gatusan ka libo ang midagsang sa Caracas ug sa laing bahin sa nasud aron ipadayag ang ilang suporta ug ipaabot ang ilang paghigugma kang Maduro ug kang Flores, ang giilang “unang kombatant” sa nasud. Nagsunog sila og mga bandera sa US.

“Hinaot nga masabtan sa mga ekstremista nga ang mga bombang ilang gipangayo (sa US) mipatay ug mopatay sa tanang mga Venezuelan, Chavista man o dili,” pamahayag sa usa raliyista. Ang mga “ekstremista” nga gisambit mao ang mga partidong gipondohan sa US nga gipangulohan sa papet niining si Maria Machado. Dugay nang gipangayo ni Machado nga atakehon sa US ang Venezuela aron pahagbaon ang gubyernong Maduro ug ituboy siya ug iyang mga kakunsaba sa estado. Bisan pa man, wala siya gibutang ni Trump sa pwesto. Hilabihang gikasilagan si Machado sa katawhang Venezuelan.

Niadtong Enero 4, nanumpa isip temporaryong presidente si Delcy Rodriguez, bise presidente sa Venezuela, subay sa konstitusyon sa nasud. Gipalihok usab sa armadong kusog ang lapad nga milisyang gitukod niini alang sa depensa sa nasud.

Internasyunal nga suporta

Paspas ug hugot ang pagkundena sa agresyon sa US ug pagdagit kang Maduro ug Flores sa Latin America, Africa ug sa uban pang mga nasud. Mibarog gilayon para kang Maduro ug sa Venezuela ang Cuba, Nicaragua ug Colombia. Nagpadayag usab og hugot nga pagsupak ang Brazil, Uruguay ug Mexico sa gihimong pag-atake. Ginaila nila ang agresyon isip atake dili lamang sa Venezuela kundili sa tibuok Latin America ug mga nasud nga nagasukol sa imperyalistang hegemonya sa US. Niining mga nasura, midagsang ang mga katawhan sa kadalanan aron suportahan ang mga Venezuelan.

Adunay dungan nga mga rali atubangan mga embahada sa US sa Germany, Spain, Belgium, France, Greece ug Turkey. Sulod sa US, gimakmak sa mga Amerikano ang agresyon sa ilang gubyerno sa mga protesta gawas sa White House, sa New York (kung asa gidala si Maduro) ug lain pang syudad.

Sa Pilipinas, nagmartsa padulong sa embahada sa US sa Maynila ang mga progresibong grupo sa pagpanguna sa Bagong Alyansang Makabayan ug Philippine-Bolivarian Venezuela Friendship Association niadtong Enero 5. Gikundena nila ang agresyon sa US ug naghatag sila og suporta sa katawhang Venezuelan ug sa ilang gubyerno.