Pagbatok sa korap ug pasistang badyet sa 2026. Nagprotesta ang mga progresibong grupo sa Mendiola niadtong Enero 5 aron makmakon ang korap ug pasistang badyet para sa 2026 nga gipirmahan ni Ferdinand Marcos Jr niadtong adlawa. Nagrali usab sila niadtong Disyembre 29, 2025 sa Kamara sa Quezon City dihang giratsada ang ratipikasyon sa badyet. Puno ang badyet sa pork barrel, unprogrammed appropriations, ug confidential funds, mga pondo alang sa kurakot ug pasismo.

Kontra pribatisasyon sa Baguio City. Human ang pipila ka bulang pagsupak, napaatras sa mga residente ang planong pribatisasyon ug “mallification” sa pangpublikong merkado sa Baguio City. Niadtong Enero 3, gianunsyo sa lokal nga gubyerno nga miatras ang SM Prime Holding Inc sa plano niining kuhaon ang merkado. Sa Enero 9, nakatakda ang pagboto sa konseho sa syudad sa pagpribatisa sa maong merkado. Niining adlawa, gikatakda nga subling magrarali ang mga grupo.

Pagbabag sa pagsirado sa merkado sa Pasay City. Gikundena sa kapin 200 ka manininda ug kapin 500 ka trabahante, kargador, ug traysikel drayber ang pagsirado sa Wowee Market sa Pasay City niadtong Disyembre 19, 2025. Gipasirad-an kini sa lokal nga gubyerno tungod sa ginasulting mga paglapas ug kakulang sa mga permit. Gatusan ang mawad-an og panginabuhian, ug mahikawan og mas baratong palaliton ang mga nagsalig dinhi nga mga residente.

Kontra-demolisyon sa komunidad sa Pasig City. Mibarog ang mga residente sa Leona Compound sa Nagpayong, Barangay Pinagbuhatan, Pasig City niadtong Enero 5 batok sa pagpalayas sa lokal nga gubyerno. Planong tukuran og ospital ug eskwelahan ang maong lugar. Supak ang mga residente sa demolisyon ilabina nga walay nakatakdang balhinan.

Balik-Luneta sa alyansang kontra korapsyon. Subling miadto sa Luneta Park sa Maynila ang Kilusang Bayan Kontra Kurakot (KBKK) aron maghalad og mga bulak ug pasidunggan si Dr. Jose Rizal sa anibersaryo sa adlaw sa pagpatay kaniya niadtong Disyembre 30, 2025. Ang Luneta Park ang nahimong saksi sa protesta kontra korapsyon sa 100,000 ka tawo niadtong Setyembre 21, 2025 ug kapin 20,000 niadtong Nobyembre 30, 2025 sa pagpanguna sa KBKK ug mga grupo nga naglangkub niini.