Sa bag-o lang nga taho sa Bagong Hukbong Bayan (BHB), nakalunsad og operasyong haras ang mga yunit niini sa South Cotabato ug Negros Oriental niadtong ulahing kwarto sa 2025.

Gipabuthan sa BHB-South Cotabato ang tropa sa 105th IB sa Sityo Kangko, Barangay Lamlahak, Lake Sebu, South Cotabato niadtong Disyembre 11, 2025 sa alas-12:50 sa kaadlawon. Pito ka bulan nang nagakampo ug nag-operasyon ang militar sa maong barangay.

Sa Negros Oriental, diha-dihang miresponde ug miatake sa BHB-Central Negros (Leonardo Panaligan Command) ang tropa sa 62nd IB nga paturagas nga namusil sa usa ka sibilyan sa Barangay Trinidad, Guihulngan City, Negros Oriental niadtong Nobyembre 21, 2025. Matud sa taho, alas-10 sa buntag kalit na lamang girakrakan sa lima ka sundalo sa 62nd IB ang mag-uumang si Rene Nellas sa Sityo Columbia samtang anaa sa iyang umahan. Luwas nga nakadagan si Nellas.

Wala masayran sa militar, adunay yunit sa BHB-Central Negros duul sa lugar. “Pagkadungog sa mga Pulang manggugubat sa mga buto, diha-diha silang nagmaniobra ug giharas ang lima ka tropa sa pasistang sundalo,” matud kang Ka JB Regalado, tigpamaba sa BHB-Central Negros.