Sa pagsugod pa lamang sa tuig, miarangkada na ang makinaryang iggugubat sa imperyalismong US, nga gipangulohan sa hungog nga pasistang si Donald Trump, presidente sa US. Niadtong Enero 3, dungan-dungan niining gibomba ang Caracas, sentrong lungsod sa Venezuela, ug uban pang kasikbit nga rehiyon, ug gipatuman ang operasyong militar aron dakpon si President Nicolas Maduro ug asawa niyang si Cilia Flores aron pugsong dad-on sila sa US.

Bisan unsa nalang nga pasangil ang gihimo ni Trump batok kang Maduro, sama sa giimbentong “drug cartel” nga iya dawng gipangulohan, aron hatagag rason ang klarong iligal nga operasyon. Apan sayod ang tibuok kalibutan sa tinuod nga hinungdan: ang lana sa Venezuela nga gilawayan ug ginaangkon ni Trump nga “ilaha.” Miangkon mismo si Trump, dihang gideklarang “pagadumalahan namo ang Venezuela ug pagakontrolon ang lana niini.”

Direktang armadong agresyon alang sa pagpangawkaw ang pag-atake sa malupigong imperyalista sa nasud nga nanalipud sa iyang kagawasan. Human gidagit si President Maduro, ginahulga usab karon ni Trump ang mipuli nga si Delcy Rodriguez, aron pugsong mosunod sa iyang dikta. Nagkahiusa karon ang katawhan sa Venezuela sa pagbarog ug pagsukol. Sa kadalanan, nagkahiusang singgit nila, “Ibalik sa amo si Maduro!”

Malukpanon usab nga gimakmak sa daghang nasud ang pag-atake sa US tungod sa paglapas niini sa mga internasyunal nga balaod ug lagda sa United Nations. Nagpadayag og “kabalaka” bisan ang mga susama ug alyadong imperyalista sa US, bisan og ginapili nilang magpadaplin lamang. Adunay mga grupong maka-US usab nga “nabalaka” sa agresyon sa US, apan hilum nga nagapalakpak sa pagdagit sa US sa anti-imperyalistang si Maduro.

Ang agresyong militar sa US sa Venezuela dili una, ug siguradong dili kini ang katapusang pagyatak sa mga gawasnong nasud sa lain-laing bahin sa kalibutan. Sukad nga nahuman ang Ikaduhang Gubat sa Kalibutan, ang US nanakop, nangatake, nanginlabot, mipatay og mga lider, nagkudeta, nagtuboy ug nagsuporta sa mga maka-US nga pasistang diktadurya sa dili moubos 30 ka nasud, mayorya sa Latin America, bisan sa Asia lakip ang Middle East. Ginabaharan usab karon sa US ang Iran, nga sama sa Venezuela, abunda usab sa lana, ug gipiling inasyunalisa kini. Gihulga usab sa pasistang hungog ang Mexico, Canada, ug Greenland.

Ilalum sa bag-ong gipirmahang National Security Strategy (NSS) ni Trump, gideklara niini ang plano nga himuong “pinakagamhanan ug pinakamakamatay” ang pwersang militar sa US. Gideklara ni Trump ang planong pagkoral sa Latin America, nga ginaila nilang “among tugkaran.” Usa kini ka hulga batok sa Cuba, Colombia, Brazil ug uban pang nasud nga nanalipud sa ilang katungod sa kaugalingong paghukum.

Ang direktang pag-atake sa US sa Venezuela usa ka bag-ong ang-ang sa paggrabe sa pasistang terorismo sa US, atubangan sa nagkagrabeng imperyalistang kontradiksyon. Gipakita sa pasistang si Trump nga walay balaod nga mobabag sa iyang kabuang. Hilabihang nabalaka ang mga karibal ug alyado sa US nga gamiton ang lana sa Venezuela isip armas sa pulitika ug ekonomiya batok kanila pinaagi sa pag-impluwensya sa kalibutanong suplay ug presyo.

Sa pagpanguna sa US, nagkadaku karon ang ginagahing pondo sa militar. Misulod na sa bag-ong ang-ang sa militarisasyon ang imperyalistang Japan sa pagbubo niini sa wala pay susamang gidak-on sa pondo sa produksyong militar. Nagkadaku usab ang galastuhong militar sa mga imperyalistang nasud sa Europe. Bisan alyado sa US sa NATO, ang France ug Germany misupak sa ginaduso sa US nga kasabutan sa Ukraine, tungod subra-sobra ang gihatag niining kontrol sa US sa rekurso sa nasud, sa disbentahe sa mga imperyalista sa Europe.

Timaan sa nagkalalum nga krisis sa imperyalismo ang nagkagrabeng inilugay sa pinakadagkung gahum sa tinubdan sa baratong hilaw nga materyales, ug mabutngan sa sobrang kapital pinaagi sa pagpautang ug pamuhunan. Ilugay sa teritoryo ang hinungdan sa miulbong mga gubat sa lain-laing bahin sa kalibutan, gikan sa proxy war sa US sa Ukraine batok sa Russia, pagpulbos sa US ug Zionistang Israel sa Gaza, pagsakmit sa mga imperyalista sa Syria, pagpamomba sa US sa Yemen ug Somalia, ug pakiglantugi sa US sa China sa South China Sea.

Sa maong konteksto, hingpit nga masabtan ang nagkadakung presensya sa mga pwersang militar sa US sa Pilipinas, ang pagdaghan sa mga base militar niini sa lain-laing bahin sa nasud, ang pagtipun-og sa kusog nga armas, ang permanenteng paglawig sa mga pwersang nabal niini sa kadagatan sa nasud, ang walay hunong nga mga ehersisyong militar ug pagpanghulhog og gubat sa Taiwan. Gitukod sa US ang Task Force Philippines aron pahugton ang kontrol niini sa Armed Forces of the Philippines ug palig-onon ang nag-unang haligi sa paghari niini sa Pilipinas. Sa mosunod nga lima ka tuig, plano sa US nga magbubo og $2.5 bilyong ayudang militar hangtud sa 2030.

Kining tanan walay kalabutan sa “pagdepensa sa balaod” o “kagawasan sa nabigasyon” sa kadagatan. Human sa gipakita sa US sa Venezuela nga pagyatak sa mga kalibutanong lagda, mga hangal ug buta nga papet sa US na lamang (ang AFP, si Marcos, ug mga grupong sama sa Akbayan) ang nagapalakpak sa pagpakuno-kunong pulis sa US sa South China Sea.

Labaw nga walay kalabutan ang presensya sa US sa ginasangyaw niining pagpanalipud sa kagawasan sa Pilipinas. Sukwahi dinhi, ang nagkadaghang mga sundalong Amerikano ug uban pang dala niining langyawng tropa sa Pilipinas ang pinakadakung pagyatak sa kaugalingnan sa nasud. Wala lamang gigamit sa US ang nasud para sa iyang imperyalistang interes, ginaamong usab niini ang Pilipinas sa gubat nga sukwahi sa kaayuhan sa katawhan. Ginapakusog niini ang AFP aron magsilbi niining kaabag sa pagsumpo sa katawhang nakigbisog.

Atubangan sa nagkagrabeng imperyalistang kaguliyang, agresyong militar, pasismo ug pagpanghulhog og gubat sa imperyalismong US, kinahanglang pakusgon sa katawhang Pilipino ang ilang pakigbisog alang sa tinuod nga kagawasan ug demokrasya. Dungan niini, kinahanglang makighiusa sa pinakalapad nga han-ay sa katawhan sa tibuok kalibutan aron babagan ang pag-arangkada sa gubat ug pasismo sa tibuok kalibutan.