Niadtong Disyembre 26, 2025, giaprubahan sa gubyerno sa Japan, sa pagpanguna ni Prime Minister Sanae Takaichi, ang paggahin og 9 trilyon yen o US$58 bilyon para sa badyet sa depensa sa nasud sa 2026. Katugbang kini sa 2% sa kinatibuk-ang produksyon sa nasud. Tungod dinhi, miuntol ang Japan sa ikatulong pwesto sa mga nasud nga adunay pinakadakung badyet alang sa depensa sa kalibutan, sunod sa US ug China.

Ang pagtaas sa badyet sa militar nagsubay sa National Security Strategy (NSS) nga gimugna sa Japan niadtong 2022. Sa duso sa US, gipadaku sa Japan ang badyet niini sa depensa. Sa 2027 pa dapat abton ang 2% nga pagsaka sa badyet alang sa depensa. Apan tungod sa kusog nga duso sa US, sayo kining gihimo sa gubyernong Takaichi.

Isip imperyalistang nasud, dugay nang gipangandoy sa nagharing hut-ong sa Japan nga mabalik ang “kanhing himaya.” Sa pagpataas niini sa gasto sa militar, naglaum usab ang gubyerno sa Japan nga mabuhi niini ang iyang ekonomiya, nga tulo ka dekada nang anaa sa istagnasyon. Isip imperyalistang gahum, kinahanglan niining palapdon ang iyang tinubdan sa hilaw nga materyales, maimpluwensyahan ug mahan-okan sa sobrang kapital.

Niadtong 2023 gihimo sa Japan ang kaugalingong plano nga Free and Open Indo-Pacific aron hatagag porma ang pagpakusog sa presensyang militar ug pagpalapad sa impluwensya sa Asia. Gipirmahan niini uban si Marcos ang dili patas nga kasabutang militar tali sa Pilipinas ug Japan nga Reciprocal Access Agreement (RAA). Giendorso ug gisuportahan kini sa Senado, lakip ang maki-US nga senador nga si Risa Hontiveros sa Akbayan.

Pagpalig-on sa pwersang iggugubat sa Japan

Kabahin sa NSS ang pagpalit ug pagpalambo sa mga sistemang misayl alang sa pagpalig-on sa depensa sa nasud. Sa duso sa US, gipalit sa Japan ang usa ka “pakete” sa mga misayl nga nagkantidad og $3.64 bilyon niadtong Enero 2025. Niadtong Nobyembre 2025 subling nagpalit ang Japan og armas sa US, lakip ang mga bomba ug bala alang sa eroplanong iggugubat sa Japan Air Self-Defence Force sa kantidad nga US$82 milyon.

Tungod sa nagkatigulang ug nagkagamay nga populasyon, ug kalisdanan sa pagmantini sa dakung ihap sa tropa, nakapukos ang gubyerno sa Japan sa pagtukod og “unmanned weapons system” o armas nga dili kinahanglan og tawo. Aron pakusgon ang depensa sa gilid sa dagat, planong maghimo og daghang drones nga pangkahanginan, ug sa ilalum ug ibabaw sa kadagatan alang sa surbeylans ug depensa. Ang sistema gitawag og SHIELD (Synchronized, Hybrid, Integrated and Enhanced Littoral Defence). Dugang dinhi ang mas dagkung drone isip depensa sa ere o airspace, “standoff” missile ug mga surface to ship missiles. Kaya sa maong mga misayl nga moigo hangtud gilay-ong 1,000 kilometro.

Tumong usab sa gubyerno sa Japan nga buhion ang industriya sa depensa pinaagi sa giusang mga proyekto ug pagbaligya og armas sa ubang nasud. Karong 2026, plano niini na maggahin og 160 bilyon yen (US$1 bilyon) aron magpalambo og “6th generation fighter jet” kaabag ang Britain ug Italy ilalum sa Global Combat Air Programme. Lakip usab sa mga proyekto ang mga drone nga kontrolado sa artificial intelligence aron molupad dungan sa mga jet.

Plano sa gubyerno sa Japan nga palutawon ang pondo alang sa depensa gikan sa pagpataas sa buhis sa mga korporasyon ug sa tabako, ug pagpataas sa buwis sa sweldo sa mga empleyado sa 2027.

Pagsukol sa katawhan sa Japan

Sa miaging mga bulan, naglunsad og mga protesta ang katawahang Japanese batok sa nagkagrabeng militarismo sa ilang gubyerno. Misalmot sa maong mga protesta ang mga Pilipinong migrante ilalum sa Bagong Alyansang Makabayan (Bayan) ug Migrante.

Nanawagan ang mga grupo sa tanang mamumuong Japanese, nagmahal sa kalinaw, ug tanang migrante ug imigrante sa Japan nga maghiusa ug batukan ang militaristang tinguha sa gubyernong Japan. Matud nila, dili dapat pagsagdan ang mga nagharing hut-ong nga gamiton ang “nasyunalismo” aron siak-siakon ang katawhan.