“Dili makatarunganon ug dili madawat” ang kumpirmasyon sa Court of Appeals (CA) sa hukum sa korte batok sa Talaingod 13, matud sa mga grupong tigpanalipud sa mga katungod sa mga minorya, mga tawhanong katungod, abugado ug uban pa. Ang Talaingod 13 ug gihukman sa korte sa kasong “child abuse” niadtong Hulyo 15, 2024. Gikumpirma ang maong hukum sa CA sa Cagayan de Oro niadtong Disyembre 16. Niadtong Enero 6, nagsang-at og motion for reconsideration sa CA ang Talaingod 13 aron hagiton ang kumpirmasyon niini.

Ang Talaingod 13 mao ang mga myembro sa delegasyong mireskyu sa mga magtutudlo ug estudyanteng Lumad sa Talaingod, Davao del Norte niadtong Nobyembre 28, 2018. Gilangkuban kini nilang kanhing Bayan Muna Rep. Satur Ocampo, ACT Teachers Rep. France Castro, Ma. Eugenia Victoria Nolasco ug siyam pang kanhing mga magtutudlo.

Matud sa mga lumad, ang dili makatarunganong desisyon batok sa Talaingod 13 direktang atake mismo kanila. Kini kabahin sa mas lapad nga estratehiya sa estado aron pahilumon ang mga misuporta sa pakigbisog sa mga lumad.

“Walay bata ug walay ginikanan nga nagreklamo. Walay kadaut nga napamatud-an, apan gihukman ang mga magtutudlo,” matud ni kanhing Rep. Eufemia Cullamat.