Bunga sa kampanya sa Migrante Manitoba ug suporta sa komunidad, malampusong naduso sa 17 ka Pilipinong mekaniko sa Winnipeg, Manitoba sa Canada ang ilang katungod sa seguridad sa trabaho. Gitangtang sila sa trabaho sa 4Tracks Ltd nga walay ligal nga hinungdan human lamang sa tulo ka semana nila sa kumpanya.

Narekrut ang mga Pilipinong mekaniko sa Pilipinas sa Venture Management isip mekaniko sa trak. Pag-abot sa Canada, gipatrabaho sila labaw sa nasabutan ug sa dili luwas nga kundisyon. Lakip dinhi ang pagpatrabaho kanila sa panahon sa tingtugnaw nga walay igong proteksyon. Gipagamit sila og bug-at nga himan, lakip ang para sa pagwelding, nga walay tukmang pagbansay o kahimanan. Gipapuyo sila sa piot kaayong kwarto, samtang ang pipila napugos na nga sa salog manghigda nga karton lang ang hapin. Nakasinati usab sila og berbal nga pagpangabuso ug pagpanghadlok aron pugngan sila nga mosukol.

Sa US, malampusong napugngan sa Tanggol Migrante Movement ang planong deportasyon kang Kuya G niadtong Disyembre 7, 2025 ug Tita Rebecca niadtong Enero 2. Sila mga Pilipinong imigrante nga gidetine sa Immigration and Customs Enforcement. Samtang napriso nakasinati sila og medikal nga pagpasagad nga nagresulta sa grabeng balatian ug kumplikasyon sa sakit. Matud sa mga duktor, delikado kaayo sa ilang panglawas ug posibleng mamatay kung pugson silang ibyahe.