Pamatuod ang mga pagsaulog sa ika-57 nga anibersaryo sa Partido Komunista ng Pilipinas (PKP) sa sulod ug gawas sa nasud sa padayon nga paglimbasog sa tibuok rebolusyonaryong kalihukan. Dakung tamparus sa rehimeng US-Marcos nga sa lain-laing lugar, ginawarawara ang Pulang bandera nga adunay bulawanong maso ug karit aron pasidunggan ang halos unum ka dekadang pagpangulo sa Partido sa demokratikong rebolusyon sa katawhan sa Pilipinas.

Ang mga selebrasyon gilunsad sa mga sanga ug komite sa Partido, mga yunit sa Bagong Hukbong Bayan (BHB) ug mga balangay ug alyadong organisasyon sa National Democratic Front (NDF). Gitimbaya usab sa mga partido ug organisasyon gikan sa ubang nasud ang PKP.

Sa mga panagtapok, nahimong tataw ang paghisgot sa mensahe sa Komite Sentral sa Partido alang sa anibersaryo. Giparangalan usab ang mga martir sa katawhan sa milabayng mga dekada.

Sa mga gerilyang nataran, nagtanghal og armas ang mga Pulang manggugubat sa BHB aron saluduhan ang Partido, taliwala padayon ang operasyong kombat sa Armed Forces of the Philippines (AFP). Nahitabo ang mga pagsaulog sa BHB sa Cagayan Valley, Southern Tagalog, Negros Island, Eastern Visayas, ug North Central Mindanao. Magpadayon sa mosunod nga mga adlaw ang mga aktibidad sa uban pang yunit.

Sa Southern Tagalog, nalunsad sa BHB ang mga serye sa panagtapok sa mga gerilyang nataran sa Batangas, Quezon ug Isla sa Mindoro. Magkabulag nga pagsaulog ang gilunsad sa mga isla sa Samar ug Leyte, sa Eastern Visayas. Sa North Central Mindanao, gigamit nga higayon ang selebrasyon aron konsolidahon ang mga Pulang manggugubat ug makalunsad og kulturanhong programa. Magtungang gabii na dihang nahuman ang aktibidad.

Matud sa mga taho, makita sa mga Pulang manggugubat ang nahimong positibong epekto sa pagtuon sa pamahayag sa Komite Sentral. Nakatabang kini aron isalikway ang mga bagahe nga nagpabug-at ug nagpalangan sa makahuluganong pag-abante sa tagsa-tagsa nilang mga gimbuhaton. Sa maong mga okasyon, hugot nga gipatuman sa BHB ang hunong-buto nga gimando sa Komite Sentral sa gitakdang mga adlaw.

Sa mga sentrong urban ug lungsod, naglunsad og mga martsa, sekretong nga asembliya, operasyon pinta ug operasyon dikit (OP-OD) ug uban pang aktibidad ang mga balangay ug alyado sa NDF. Nagsugod kini niadtong ikatulong semana sa Disyembre 2025 ug nagpadayon hangtud niining Enero.

Sa Metro Manila, magkasunod nga martsa ang gilunsad sa Maynila ug Pasay City niadtong Disyembre 21 ug 22, 2025. Lakip sa mga grupong misalmot sa protesta ang Kabataang Makabayan (KM), Artista at Manunulat ng Sambayanan (Armas), Makabayang Kilusan ng Bagong Kababaihan (Makibaka), Revolutionary Council of Trade Unions, Makabayang Kawaning Pilipino ug Compatriots.

Sa Central Luzon, nahimo ang panagtapok niadtong Disyembre 26, 2025 sa usa ka wala hinganling lokasyon. Sa Rizal, gilunsad sa NDF ang asembliya niadtong Disyembre 30, 2025 nga gisundan sa pagsab-it og duha ka higanteng istrimer niadtong Enero 2 sa Antipolo City.

Sa pagpanguna sa Compatriots Philippines, kapin 100 ka tawo ang misalmot sa usa ka kulturanhong programa sa usa ka lugar sa Southern Tagalog. Misalmot dinhi ang mga myembro sa grupo gikan sa Rizal, Bulacan, ug Metro Manila, ug mga paryente sa mga martir sa katawhan. Pipila ka adlaw ayha niini, nagsab-it og mga istrimer ang grupo sa kalsada Commonwealth Avenue sa Quezon City.

Sa Australia, naglunsad og asembliya ug operasyon-dikit ang Compatriots-NDFP-Australia ug Compatriots-KM-Narmm. Kapin 300 usab ang misalmot sa online broadcast sa NDF International Office aron basahon ang pamahayag sa Komite Sentral.

“Ang pagpanglimbasog ug dedikasyon [sa Partido] nga tumanon ang makasaysayanong tahas sa pagpaasdang sa tinguha sa katawhan naghatag inspirasyon ug padayong nakahatag inspirasyon sa masa nga mosukol,” matud ni Ka Elias Dipasupil, kinatibuk-ang kalihim sa NDF. Dugang niya, labaw nga napakusog sa Partido ang pagpangulo niini sa masang Pilipino sa paglahutay sa kasamtangang kalihukang pagtul-id.

Daghan pang mga balangay ug alyado sa NDF ang nagpagula og pamahayag alang sa anibersaryo sa Partido.