Nasaknap nga insayangkat dagiti progresibo a grupo ti kampanya ti panagbisita ken panagkalap ti suporta para kadagiti balud pulitikal ti Pilipinas idi Disyembre 2025. Nagtignay ken nakipaset iti kampanya dagiti salaknib ti karbengan-tao, kapamilya dagiti balud pulitikal, tao’t simbaan, dagiti abugado, kabataan, babbai, mangmangged ken dagiti grupo nga internasyunal.

Naiyulat ti panagbisita kadagiti pagbaludan iti Northern Luzon, Aurora, Nueva Ecija, Bulacan, Laguna, Metro Manila, Iloilo, Tacloban City, Butuan City, North Cotabato ken Davao City. Dagiti balud pulitikal ket nabalonan ti taraon, usar a pangkalinisan, agas ken dagiti surat a mangiyeb-ebkas ti suporta iti dangadang da tapno makaruk-at.

Adda ti dandani 700 a balud pulitikal iti Pilipinas nu sadinno a nasurok 160 ti naaresto iti panawen ti rehimen Marcos. Kabilang ditoy ti saan a bumaba iti 136 a balud a babbai, 93 natataengan ken 89 a masakit.