Bunga ti kampanya ti Migrante Manitoba ken suporta ti komunidad, balligi a nailaban ti 17 Pilipino a mekaniko idiay Winnipeg, Manitoba, Canada ti karbengan da iti seguridad iti trabaho. Inikkat isuda ti 4Tracks Ltd nga awanan ligal a rason kalpasan laeng ti tallo a lawas da iti kumpanya.

Dagiti Pilipino a mekaniko ket rinekrut iti Pilipinas ti Venture Management kas mekaniko ti trak. Idi simmangpet da idiay Canada, pinagakem da isuda ti trabaho a labes iti katulagan ken iti saan a natalged a kundisyon. Kabilang ditoy ti panagpatrabaho kadakwada iti panawen ti lammiis nga awanan ti naan-anay a proteksyon. Pinagusar da isuda ti nadadagsen a ramit, kabilang dagiti paglanang nga awanan ti usto a panagsanay wenno usar. Pinaggian da isuda iti naiilet a kwarto, bayat a ti dadduma ket kapilitan nga iti datar a nagidda a karton laeng ti aplag da. Nakapadas da met ti berbal a panagabuso ken pammutbuteng tapno pawilan isuda a lumaban.

Idiay US, balligi a nalapdan ti Tanggol Migrante Movement ti plano a deportasyon kada Kuya G idi Disyembre 7, 2025 ken Tita Rebecca idi Enero 2. Isuda ket Pilipino nga imigrante nga inbalud ti Immigration and Customs Enforcement. Bayat a nakabalud ket nakapadas da ti medikal a panagbaybay-a a nangitunda ti nakaro a sagubanit ken kumplikasyon iti sakit da. Segun kadagiti duktor, palalo a delikado iti salun-at ken mabalin nga ipatay da nu piliten nga ibyahe isuda.