Saan a nagsarday ti Armed Forces of the Philippines (AFP) ken Philippine National Police (PNP) iti panagimula ti terorismo ken panagatake kadagiti komunidad ken umili uray iti panawen ti Paskwa ken Baro Tawen. Sakbay a naggibus ti 2025, nailista dagiti kaso ti pammapatay, panagdukot, panagaresto ken dadduma pay a panaglabsing iti karbengan-tao.

Pammapatay. Asitgan a pinaltogan dagiti tauhan ti AFP ti babae a lider-mannalon a ni Warlita Jimenez, 55, iti Sityo Makilo, Barangay Camansi, Kabankalan City idiay Negros Occidental idi Disyembre 23, 2025. Ti biktima ket asawa ti lider-mannalon a ni Joseph Jimenez a pinatay ti 15th IB idi Nobyembre 30, 2022.

Panagdukot. Dinukot dagiti pwersa ti estado ti tauhan ti National Democratic Front-Cagayan Valley (NDF-CV) a ni Scarlet Lyne Gayo. Ni Gayo ket maudi a nakita idiay Cavite idi Disyembre 9, 2025 ken saan pay laeng a makontak agingga iti agdama. Nagdanag ti NDF-CV iti seguridad ken biag ni Gayo.

Panag-aresto. Idiay Occidental Mindoro, inaresto ti pinagtipon a pwersa ti pulis ken 76th IB ni Ramon “Monet” Alcantara idiay Barangay San Vicente, Abra de Ilog idi Disyembre 23, 2025. Maak-akusaran isuna a karaman iti maysa nga engkwentro ti 76th IB ken NPA. Ni Alcantara ket aktibo a tumubtubngar iti panagminas idiay Mindoro ken mangitantandudo iti karbengan dagiti katutubo a Mangyan para iti ansestral a daga da. Timmaray isuna iti kina-mayor iti Abra de Ilog idi eleksyon 2022.

Idiay Baguio City, inaresto dagiti pulis ti tagapagsarita ti Kilusang Mayo Uno-Cordillera a ni Mike Cabangon idi Disyembre 27, 2025. Sumangsango isuna iti kaso a “terrorism financing.” Nakaruk-at isuna kalpasan nga agpyansa.

Idiay Manila, balbaliw nga inaresto dagiti pulis idi Disyembre 18, 2025 ni Ryan Ombrog iti kaso a panagpuor. Ni Ombrog ket kabilang iti nasurok 270 a naaresto kalpasan ti protesta a kontra korapsyon idi Setyembre 21, 2025.

Pammaltog. Idiay Leyte, nagreklamo idi Disyembre 2025 dagiti residente ti Barangay Villa Corazon, Burauen iti paulit-ulit a panagpalto-paltog ti CAFGU (Citizen Armed Force Geographical Unit) iti komunidad. Segun kadagiti residente, mano a daras a kella-kellaat nga agpappaputok dagitoy iti kampo da iti katengngaan ti rabii wenno parbangon. Pagdandanagan met dagiti residente ti panagbarbartek dagiti tauhan ti CAFGU iti mismo a kampo militar.

Panaglipit. Mano nga aldaw sakbay ti panagrambak ti Paskwa, dinarup ken awan sarday nga inatake ti 62nd IB dagiti komunidad iti Guihulngan City ken Moises Padilla iti isla ti Negros. Iti uneg ti 10 nga aldaw manipud Disyembre 13, 2025, iligal a sinerrek ken hinalughog dagiti elemento dagitoy dagiti balbalay. Nangbutbuteng, nagpangta ken nangpatay da pay ti maysa a nuang.