Idi Disyembre 26, 2025, inaprubaran ti gubyerno ti Japan, iti panangiyuna ni Prime Minister Sanae Takaichi, ti panangilatang ti 9 trilyon yen wenno US$58 bilyon para iti badyet iti depensa ti pagilyan iti 2026. Kabatog daytoy ti 2% ti kabuklan a produksyon ti pagilyan. Gapu ditoy, limmagto ti Japan iti maikatlo a pwesto kadagiti pagilyan nga addaan kangatwan a badyet para iti depensa iti lubong, kasaruno ti US ken China.

Ti panagngato ti badyet iti militar ket nakabasar iti National Security Strategy (NSS) a binukel ti Japan idi 2022. Iti sugsog ti US, pinadakkel ti Japan ti badyet na iti depensa. Inton 2027 pay koma a danunen da ti 2% a panagngato ti badyet para iti depensa. Ngem gapu iti napigsa a duron ti US, nasapa nga inaramid daytoy ti gubyerno a Takaichi.

Kas imperyalista a pagilyan, nabayagen nga ar-arapaapen ti agar-ari a dasig iti Japan a maisubli ti “sigud a glorya” da. Iti panagngato ti panaggastos para iti militar, mangnamnama met ti gubyerno ti Japan a mabiag daytoy ti ekonomya na a tallo a tawenen nga adda iti istagnasyon. Kas imperyalista a bileg, kasapulan a palawaen daytoy ti pagalaan na iti naata a materyales, ti maimpluwensyaan ken pangipanan ti sobra a kapital.

Idi 2023 a binukel ti Japan ti bukod na a plano a Free and Open Indo-Pacific tapno makita ti panagpapigsa ti bukod na a presensya militar ken panagpalawa ti impluwensya na iti Asia. Kadwa na ni Marcos, pinirmaan na ti saan a patas a katulagan militar iti baet ti Pilipinas ken Japan a Reciprocal Access Agreement (RAA). Inyendorso ken sinuportaran daytoy ti Senado, kabilang ti maka-US a senador a ni Risa Hontiveros ti Akbayan.

Panangpatibker ti pwersa a panggubat ti Japan

Paset ti NSS ti panaggatang ken panangpadur-as kadagiti sistema a misayl para iti panangpatibker ti depensa ti pagilyan. Iti met laeng duron ti US, ginatang ti Japan ti maysa a “pakete” dagiti misayl nga agbalor $3.64 bilyon idi Enero 2025. Idi Nobyembre 2025 a balbaliw a gimmatang ti Japan ti armas iti US, kabilang dagiti bomba ken bala para iti eroplano a panggubat ti Japan Air Self-Defence Force iti gatad a US$82 milyon.

Gapu iti lumaklakay ken bumasbassit a populasyon ken kinarigat iti panangmantinir ti dakkel a bilang ti tropa, inturong ti gubyerno ti Japan ti imatang na iti panangbukel ti “unmanned weapons system” wenno armas a saan nga agkasapulan ti tao. Tapno papigsaen ti depensa iti igid baybay, plano ti Japan nga agbukel ti dakkel a bilang ti drones a pangtangatang, ken para iti uneg ken rabaw ti baybay para iti surbeylans ken depensa. Ti sistema ket naawagan a SHIELD (Synchronized, Hybrid, Integrated and Enhanced Littoral Defence). Nayon ditoy dagiti dakdakkel a drone kas pangsangga iti tangatang, “standoff” missile ken dagiti surface to ship missiles. Kabaelan dagitoy a misayl a tumama agingga iti kaadayo a 1,000 kilometro.

Panggep met ti gubyerno ti Japan a biagen ti industriya iti depensa babaen ti pinagtipon a proyekto ken panaglako ti armas iti sabali a pagilyan. Tatta 2026, plano daytoy a mangilatang ti 160 bilyon yen (US$1 bilyon) tapno agpadur-as ti “6th generation fighter jet” katinnulong ti Britain ken Italy iti sidong ti Global Combat Air Programme. Karaman met kadagiti proyekto dagiti drone a kontrolado ti artificial intelligence tapno agtayab kagiddan dagiti jet.

Plano ti gubyerno ti Japan a patauden ti pondo para iti depensa manipud iti panagngato ti buwis dagiti korporasyon ken iti tabako ken panangingato ti buwis iti sweldo dagiti empleyado iti 2027.

Panaglaban ti umili iti Japan

Kadagiti napalabas a bulan, ti umili a Japanese ket nagisayangkat kadagiti tignay laban iti umir-irteng a militarismo ti gubyerno da. Dimmar-ay kadagitoy a tignay dagiti Pilipino a migrante iti sidong ti Bagong Alyansang Makabayan (Bayan) ken Migrante.

Immawag dagiti grupo iti amin a mangmangged a Japanese, dagiti mangipatpateg iti kapya ken amin a migrante ken imigrante iti Japan nga agkaykaysa ken labanan ti militarista a turongen ti gubyerno a Japan. Kunada, saan a rumbeng a baybay-an dagiti agar-ari a dasig nga aramaten ti “nasyunalismo” tapno pagsisinaen ti umili.