“Saan a nainkalintegan ken saan a maaklon” ti kumpirmasyon ti Court of Appeals (CA) iti husga ti korte laban iti Talaingod 13, segun kadagiti grupo a salaknib iti karbengan dagiti minorya, salaknib iti karbengan-tao, abugado ken dadduma pay. Ti Talaingod 13 ket kinedngan ti korte iti kaso a “child abuse” idi Hulyo 15, 2024. Daytoy a husga ket kinumpirma ti CA iti Cagayan de Oro idi Disyembre 16. Idi Enero 6, nagipila ti motion for reconsideration iti CA ti Talaingod 13 tapno kariten daytoy a kumpirmasyon.

Ti Talaingod 13 ket dagiti kameng ti delegasyon nga immarayat kadagiti manursuro ken estudyante a Lumad idiay Talaingod, Davao del Norte idi Nobyembre 28, 2018. Bukbuklen daytoy da dati a Bayan Muna Rep. Satur Ocampo, ACT Teachers Rep. France Castro, Ma. Eugenia Victoria Nolasco ken siyam pay a dati a manursuro.

Segun kadagiti katutubo, ti saan a nainkalintegan a desisyon laban iti Talaingod 13 ket direkta nga atake kadakwada. Daytoy ket paset ti nalawlawa nga estratehiya tapno pagulimeken dagiti sumupsuporta iti laban dagiti katutubo.

“Awan ti ubing ken awan ti nagannak a nagreklamo. Awan ti dangran a napaneknekan, ngem nakedngan latta dagiti manursuro,” segun ken dati a Rep. Eufemia Cullamat.