Balligi a narambakan iti uneg dagiti sona a gerilya ti Mindoro ti maika-57 anibersaryo ti Communist Party of the Philippines iti tengnga ti awan sarday nga operasyon dagiti tropa ti 203rd IBde ken pulis. Iti panangiyuna dagiti yunit ti New People’s Army-Mindoro (Lucio de Guzman Command), naisayangkat dagiti pulong anibersaryo iti tema ti pablaak ti Komite Sentral a “Nakasaysayaat ti sitwasyon tapno ad-adda pay nga iyabante ti demokratiko a rebolusyon ti umili.”

Iti intero a 2025, linabanan ti NPA-Mindoro ken umili a Mindoreño ti napigsa a kontra-rebolusyonaryo a gubat iti isla. Mano a daras nga indeklara ti 203rd IBde ken uray ti 2nd ID a rebbeken da ti rebolusyonaryo a tignay iti Mindoro idi 2025.

Sinublian dagiti rebolusyonaryo a pwersa ti narimat a pakasaritaan ti Partido ken ti naballigi a panangidaulo daytoy iti unos ti 57 a tawen. Iti maysa a pablaak, inyulat ti tagapagsarita ti NPA-Mindoro a ni Ka Madaay Gasic nga iti anag ti panagilinteg ken tarabay ti Partido ket nadanon ken balbaliw a natignayan ti yunit ti 84% dagiti ili iti isla ken signipikante a bilang dagiti baryo.

Pulong panagrambak

Natalantan kadagiti naangay a pulong anibersaryo ti sangalubongan a sitwasyon, ti pakasaritaan ti Partido, dagiti istorya ti balligi ti rebolusyon agraryo idiay Mindoro ken dagiti karit, awag ken madagdagus a rebbengen para iti panagpapigsa ti rebolusyonaryo a tignay.

Dagitoy a pulong ket namarisan kadagiti pangkultura a pabuya kas ti kanta-garaw ti “Ang Gabay,” bukanegan a “Ti Pudno a Hukbo ti Umili,” drama a mangipakpakita ti inaldaw a dangadang ti masa ken panangarakup da iti rebolusyon ken ti aggigiddan a panagsala iti kanta a “Nu Awan ti NPA.”

Napadayawan met kadagiti programa dagiti martir ti rebolusyon a Pilipino kabilang dagiti baro a banwar a nangidaton ti biag da idi napalabas a tawen.

Dimmar-ay kadagiti selebrasyon dagiti masa a mannalon ken katutubo a Mangyan, dagiti lokal nga aktibista a masa ken dagiti bisita manipud iti syudad.

Makabulan a panagsagana

Makabulan ti Disyembre a rinambakan dagiti rebolusyonaryo a pwersa ti anibersaryo ti Partido. Kadagiti yunit ti NPA, naangay dagiti pakauna nga aktibidad kas kadagiti pangkultura nga aktibidad ken linawas a kapihan. Idi mismo Disyembre 26, 2025, naangay ti panangitag-ay ti bandera ti Partido kadwa ti masa.

Kas panagannatop iti sitwasyon militar ken nairut nga iskedyul ti produksyon, binukel dagiti yunit ti plano para kadagiti nabiit ken babassit a pulong anibersaryo a maisaysayangkat kaano man ken sadinno man a libre dagiti bumaryo. Adda ti maysa a yunit a nagisayangkat ti pulong anibersaryo iti nadalanan da a balay bayat a magmagna da manipud iti maysa a dakkel a taripnong. Naitakder ditoy ti lokal a timpuyog ti masa.

Ti maysa pay a yunit ti NPA ket nangted met ti panagsanay kadagiti residente iti maysa a militarisado nga erya. Sungbat daytoy iti kiddaw da nga maaddaan ti kabaelan a salakniban ti bagbagi da laban kadagiti agop-operasyon a soldado ken ahente a paniktik a masansan iti erya.

Panagarakup ti masa iti rebolusyonaryo a tarigagay

Saan a nagballigi ti makabulan a panagrambak iti anibersaryo ti Partido nu awan ti nabara ken sipupuso a suporta ti masa iti panggep ti Partido. Insakad da dagiti aktibidad manipud iti panagluto kadagiti sagana, panagsakdo, panangisigurado iti seguridad, panagsukon ken panagitulod kadagiti bisita iti sona a gerilya ken aktwal a pannakipaset iti programa.

“Saan a masigurado ti balligi ti rebolusyon nu saan a napinget iti gawaing masa,” inyebkas ni Ka Ruffa, kagawad ti maysa a yunit ti NPA. Naragsak a pinagsasangwan ti bumaryo ken hukbo dagiti simple a sagana a karne ti manok, pansit, ispageti ken inkiwar.

“Nagdesisyonak a paatiddogen ti pannakipagbiag ko iti yunit gapu ta nariingak iti sipupuso a dedikasyon ti Hukbo iti panagorganisa ken panangpadur-as iti biag ti masa,” segun ken Ka Elias, maysa kadagiti kabataan a bisita.