Dagiti panagrambak iti pagilyan ken ballasiw-taaw iti maika-57 anibersaryo ti Communist Party of the Philippines ket pammaneknek ti agtultuloy a panagpinget ti intero a rebolusyonaryo a tignay. Dakkel a tungpa iti rupa ti rehimen US-Marcos nga iti nadumaduma a lugar ket naiwagayway ti Nalabbaga a bandera nga addaan balitok a maso ken karit tapno padayawan ti dandani innem a dekada ti panangidaulo ti Partido iti demokratiko a rebolusyon ti umili iti Pilipinas.

Dagiti panagrambak ket insayangkat dagiti sangay ken komite ti Partido, dagiti yunit ti New People’s Army ken alyado nga organisasyon ti National Democratic Front (NDF). Kabayatan na, nangidanon met ti kablaaw iti CPP dagiti partido ken organisasyon manipud iti sabali a pagilyan.

Kadagitoy a taripnong, limmatak ti panagtalantan iti mensahe ti Komite Sentral ti Partido para iti anibersaryo. Napadayawan met kadagitoy nga aktibidad dagiti martir ti umili kadagiti napalabas a dekada.

Kadagiti larangan gerilya, nagitag-ay ti armas dagiti Nalabbaga a mannakigubat tapno padayawan ti Partido, uray pay agtultuloy ti operasyon kombat ti Armed Forces of the Philippines (AFP). Naiyulat dagiti panagrambak ti NPA idiay Cagayan Valley, Southern Tagalog, Negros Island, Eastern Visayas ken North Central Mindanao. Nagtultuloy kadagiti simmaruno nga aldaw dagiti aktibidad ti nadumaduma pay a yunit.

Idiay Southern Tagalog, insayangkat ti NPA dagiti serye ti taripnong kadagiti larangan gerilya idiay Batangas, Quezon ken Isla ti Mindoro. Nagsina a panagrambak ti naangay kadagiti isla ti Samar ken Leyte idiay Eastern Visayas. Idiay North Central Mindanao, ti selebrasyon ket naaramat a gundaway tapno konsolidaen dagiti Nalabbaga a mannakigubat ken inruswat da ti programa a pangkultura. Agtengngan ti rabii idi nalpas ti aktibidad.

Segun kadagiti ulat, makita la unay kadagiti Nalabbaga a mannakigubat ti positibo nga epekto ti panagadal iti pablaak ti Komite Sentral. Inbingay da a nakatulong daytoy tapno iwaksi dagiti bagahe a mangpadpadagsen ken mangpabpabuntog iti signipikante a panagabante dagiti trabaho da. Kadagitoy nga okasyon, nairut nga inpatungpal ti NPA ti ceasefire nga inyatas ti Komite Sentral kadagiti naituding nga aldaw.

Kadagiti sentro nga urban ken syudad, insayangkat dagiti balangay ken alyado ti NDF dagiti martsa, limed a taripnong, operasyon pinta ken operasyon dikit (OP-OD) ken dadduma pay nga aktibidad. Nangrugi dagitoy idi maikatlo a lawas ti Disyembre 2025 ken nagtuloy agingga daytoy Enero.

Idiay Metro Manila, agsaruno a martsa ti naisayangkat idiay Manila ken Pasay City idi Disyembre 21 ken 22, 2025. Karaman kadagiti grupo a dimmar-ay kadagiti protesta ti Kabataang Makabayan (KM), Artista at Manunulat ng Sambayanan (Armas), Makabayang Kilusan ng Bagong Kababaihan (Makibaka), Revolutionary Council of Trade Unions, Makabayang Kawaning Pilipino ken Compatriots.

Idiay Central Luzon, naangay ti taripnong idi Disyembre 26, 2025 iti saan a nadakamat a lokasyon. Idiay Rizal, insayangkat ti NDF ti taripnong idi Disyembre 30, 2025 a sinaruno ti panagisab-it ti dua a higante a balatengga idi Enero 2 idiay Antipolo City.

Iti panangiyuna ti Compatriots Philippines, nasurok 100 katao ti dimmar-ay iti maysa a programa a pangkultura iti maysa a lokasyon idiay Southern Tagalog. Dimmar-ay ditoy dagiti kameng ti grupo karaman dagiti kapamilya dagiti martir manipud Rizal, Bulacan ken Metro Manila. Mano nga aldaw sakbay daytoy, nagisab-it kadagiti balatengga ti grupo iti bennat ti Commonwealth Avenue idiay Quezon City.

Idiay Australia, nagiruswat ti taripnong ken operasyon-dikit ti Compatriots-NDFP-Australia ken Compatriots-KM-Narmm. Nasurok 300 met ti nakipaset iti online broadcast ti NDF International Office tapno basaen ti pablaak ti Komite Sentral.

“Ti panagpinget ken dedikasyon [ti Partido] nga akemen ti istorikal a rebbengen iti panangiyabante iti tarigagay ti umili ket nangipaay ti inspirasyon ken agtultuloy a mangipapaay ti inspirasyon iti masa a bumangon,” kuna ni Ka Elias Dipasupil, kabuklan a kalihim ti NDF. Nayon na, ad-adda a mapappapigsa ti Partido ti panangidaulo na iti masa a Pilipino iti panangipinget iti agdama a tignay panagilinteg.

Adu pay a balangay ken alyado ti NDF ti nagiruar ti pablaak para iti anibersaryo ti Partido.