Idi mismo Enero 3, aldaw ti armado a panagraut ti pwersa a militar ti US iti Venezuela, ken panagdukot iti presidente daytoy a ni Nicolas Maduro, ken iti asawa na a ni Cilia Flores, naglayus iti kalsada ti agrebrebelde nga umili a Venezuelan. Kinundenar da ti panagatake iti soberanya da ken inrupir da ti madagdagus a panangisubli iti presidente da ken ti asawa na.

“Ti panggep daytoy nga atake ket awan sabali nu saan nga agawen dagiti estratehiko a rekurso ti Venezuela, partikular ti langis ken dagiti mineral, iti gandat a dadaelen ti independensya iti pulitika ti pagilyan. Saan da nga agballigi,” segun iti gubyerno a Venezuelan iti umuna nga upisyal a pablaak daytoy kalpasan ti agresyon. Nainget nga inlaksid ken kinundenar ti nasao a gubyerno ti agresyon a militar a nangpuntirya iti teritoryo iti nadumaduma a sibilyan ken militar a pasilidad iti pagilyan. Nasurok 80 Venezuelan ti naiyulat a napatay iti panagatake.

Mano nga oras kalpasan ti panagdukot, sipapangas nga indeklara ni Donald Trump a ti US ti “mangpatarayen” iti Venezuela, kabilang ti nalalawa a rekurso daytoy iti langis. Ti panangikkat ken Maduro ket naan-anay a sinuportaran dagiti pagilyan ti European Union a bukatot iti langis ken rekurso kasta met ti Japan, Australia ken dadduma pay nga aso-aso nga estado ti US. Dagus da nga immawag ti “natalinaay a transisyon” tapno ipatugaw ti maysa nga aso-aso nga estado a mangilukat iti Venezuela iti panagkamkam ti dadakkel a kumpanya iti langis. Sinuportaran met daytoy dagiti sosyal demokrata a grupo nga agpampammarang a kontra iti agresyon ngem simmurot iti panangikalintegan iti panangdukot ken Maduro.

Binabalaw ti Communist Party of the Philippines (CPP) ti agresyon militar ti imperyalismo a US idiay Venezuela. Inawagan ti CPP ni Trump a “mauyong a pasista” iti panangimandar ti panagraut iti Venezuela. Kuna ti Partido, sigurado a pasgedan daytoy ti patriyotiko a pungtot ti umili ti Venezuela.

Saan a maatiw a pangngeddeng

“¡Maduro, aguanta, que el pueblo se levanta!” (Maduro, kumpet laeng, rumukrukwas ti umili!) ti pukkaw dagiti Venezuelan iti kalsada. Ginasut a ribo ti bimmuyat iti Caracas ken dadduma pay a paset ti pagilyan tapno iyebkas ti suporta da ken ipadanon ti panagayat da ken Maduro ken Flores, ti naawagan nga “umuna a kombatant” ti pagilyan. Nagpuor da kadagiti bandera ti US.

“Sapay koma ta maawatan dagiti ekstremista a ti bomba a dinawat da (iti US) ket pimmapatay ken pumatay iti amin a Venezuelan, Chavista man wenno saan,” pablaak ti maysa a raliyista. Dagiti “ekstremista” a dinakamat na ket dagiti partido a pinondoan ti US nga idadaulwan ti paspasurot na a ni Maria Machado. Nabayagen a kiniddaw ni Machado a rauten ti US ti Venezuela tapno pabagsaken ti gubyerno a Maduro ken ipatugaw isuna ken dagiti kakunsabos na iti estado. Nu pay kasta, saan nga inpwesto isuna ni Trump. Ni Machado ket palalo a kagurgura dagiti kailyan na.

Idi Enero 4, nagsapata kas temporaryo a presidente ni Delcy Rodriguez, bise presidente ti Venezuela, maitunos iti konstitusyon ti pagilyan. Pinatignay met ti armado a pwersa ti nalawa a milisya nga intakder para iti depensa ti ina a pagilyan.

Internasyunal a suporta

Napaspas ken nainget ti panagkundenar iti agresyon ti US ken panagdukot kada Maduro ken Flores idiay Latin America, kasta met idiay Africa ken dadduma pay a pagilyan. Dagus a timmakder para ken Maduro ken Venezuela ti Cuba, Nicaragua ken Colombia. Nagiyebkas met ti nainget a panagsupyat ti Brazil, Uruguay ken Mexico iti naaramid a panagraut. Ibilbilang da daytoy nga agresyon kas atake saan laeng nga iti Venezuela nu di ket iti intero a Latin America ken kadagiti pagilyan a lumablaban iti imperyalista a hegemonya ti US. Kadagitoy a pagilyan, nagturong ti umili iti kalsada tapno suportaran dagiti Venezuelan.

Naigiddan dagiti rali iti sango dagiti embahada ti US idiay Germany, Spain, Belgium, France, Greece ken Turkey. Kadagiti tignay iti ruar ti White House idiay New York, ken dadduma pay a syudad idiay US (nu sadinno a naipan ni Maduro), binabalaw dagiti Amerikano ti agresyon ti bukod da a gubyerno.

Iti Pilipinas, nagmartsa agturong iti embahada ti US iti Manila dagiti progresibo a grupo iti panangiyuna ti Bagong Alyansang Makabayan ken Philippine-Bolivarian Venezuela Friendship Association idi Enero 5. Kinundenar da ti agresyon ti US ken nangipaay da ti suporta iti umili a Venezuelan ken iti gubyerno da.