Matagumpay na ipinagdiwang sa loob ng mga sonang gerilya ng Mindoro ang ika-57 anibersaryo ng Partido Komunista ng Pilipinas (PKP) sa gitna ng walang puknat na operasyon ng mga tropa ng 203rd IBde at pulis. Sa pangunguna ng mga yunit ng Bagong Hukbong Bayan-Mindoro (Lucio de Guzman Command), nailunsad ang mga pulong anibersaryo sa tema ng pahayag ng Komite Sentral na “Napakainam ng sitwasyon para ibayong isulong ang demokratikong rebolusyong bayan.”

Sa buong 2025, nilabanan ng BHB-Mindoro at mamamayang Mindoreño ang maigting na kontra-rebolusyonaryong digma sa isla. Makailang ulit na idineklara ng 203rd IBde at maging ng 2nd ID na dudurugin nito ang rebolusyonaryong kilusan sa Mindoro noong 2025.

Nagbalik-tanaw ang mga rebolusyonaryong pwersa sa maningning na kasaysayan ng Partido at ng matagumpay na pamumuno nito sa rebolusyong Pilipino sa loob ng 57 taon. Sa isang pahayag, iniulat ng tagapagsalita ng BHB-Mindoro na si Ka Madaay Gasic na sa diwa ng pagwawasto at gabay ng Partido ay inabot ng yunit at muling nakilusan ang 84% ng mga bayan sa isla at signipikanteng bilang ng mga baryo.

Pulong pagdiriwang

Tinalakay sa isinagawang mga pulong anibersaryo ang pandaigdigan at pambansang sitwasyon, kasaysayan ng Partido, mga kwento ng tagumpay ng rebolusyong agraryo sa Mindoro, at ang mga hamon, panawagan at kagyat na tungkulin para sa pagpapalakas ng rebolusyonaryong kilusan.

Binigyang kulay ang mga pulong na ito ng mga pangkulturang pagtatanghal gaya ng awit-galaw ng “Ang Gabay,” balagtasan na “Ang Tunay na Hukbo ng Mamamayan,” dula na nagpapakita ng araw-araw na pakikibaka ng masa at pagyakap nila sa rebolusyon at ang sabayang pagsayaw sa kantang “Kun Walay BHB.”

Pinarangalan din sa mga programa ang mga martir ng rebolusyong Pilipino kabilang ang mga bagong bayani na nag-alay ng kanilang buhay noong nakaraang taon.

Dumalo sa mga pagdiriwang ang mga masang magsasaka at katutubong Mangyan, mga lokal na aktibistang masa, at mga bumisita mula sa lungsod.

Isang buwang paghahanda

Buong buwan ng Disyembre, ipinagdiwang ng mga rebolusyonaryong pwersa ang anibersaryo ng Partido. Sa mga yunit ng BHB, nagkaroon ng paunang mga aktibidad kagaya ng mga pangkulturang aktibidad at lingguhang kapihan. Noon mismong Disyembre 26, 2025, isinagawa ang pagtatanghal ng bandila ng Partido kasama ang masa.

Bilang pag-angkop sa sitwasyong militar at abalang iskedyul ng produksyon, binuo ng mga yunit ang plano para sa mga daglian at maliitang mga pulong anibersaryo na inilulunsad kailanman at saanman libre ang taumbaryo. May isang yunit na naglunsad ng pulong anibersaryo sa nadaanang bahay habang nasa lakaran mula sa isang malaking pagtitipon. Naitayo dito ang lokal na samahang masa.

Nagbigay naman ang isa pang yunit ng BHB ng pagsasanay sa mga residente sa isang militarisadong erya. Tugon ito sa kahilingan nila na magkaroon ng kakayahang ipagtanggol ang kanilang sarili laban sa nag-ooperasyong mga sundalo at mga ahente paniktik na madalas sa erya.

Pagyakap ng masa sa rebolusyonaryong mithiin

Hindi magiging matagumpay ang buong buwang pagdiriwang ng anibersaryo ng Partido kung wala ang mainit at taus-pusong pagsuporta ng masa sa adhikain ng Partido. Itinaguyod nila ang mga aktibidad mula sa pagluluto ng mga handa, pag-iigib, pagtitiyak ng seguridad, paghahatid at sundo sa mga bumisita sa sonang gerilya at aktwal na paglahok sa programa.

“Hindi matitiyak ang tagumpay ng rebolusyon kung hindi magiging mapangahas sa gawaing masa,” pahayag ni Ka Ruffa, kagawad ng isang yunit ng BHB. Masayang pinagsalu-saluhan ng taumbaryo at hukbo ang munting handang karneng manok, pansit, ispageti at biko.

“Nagpasya akong palawigin ang pakikimuhay ko sa yunit dahil napukaw ako sa taus-pusong dedikasyon ng Hukbo sa pag-oorganisa at pagpapaunlad sa buhay ng masa,” ayon kay Ka Elias, isa sa kabataang bisita.