Noong Disyembre 26, 2025, inaprubahan ng gubyerno ng Japan, sa pangunguna ni Prime Minister Sanae Takaichi, ang paglaan ng 9 trilyon yen o US$58 bilyon para sa badyet sa depensa ng bansa sa 2026. Katumbas ito ng 2% ng kabuuang produksyon ng bansa. Dahil dito, lumukso ang Japan sa ikatlong pwesto sa mga bansa na may pinakamalaking badyet para sa sa depensa sa mundo, kasunod ng US at China.

Ang pagtaas ng badyet sa militar ay nakabatay sa National Security Strategy (NSS) na binuo ng Japan noong 2022. Sa udyok ng US, pinalaki ng Japan ang badyet nito sa depensa. Sa 2027 pa dapat aabutin ang 2% na pagtaas ng badyet para sa depensa. Ngunit dahil sa malakas na tulak ng US, maaga itong ginawa ng gubyernong Takaichi.

Bilang imperyalistang bansa, matagal nang pinapangarap ng naghaharing uri sa Japan na maibalik ang “dating kaluwalhatian.” Sa pagtaas nito ng paggastos para sa militar, umaasa din ang gubyerno ng Japan na mabubuhay nito ang kanyang ekonomya, na tatlong dekada nang nasa istagnasyon. Bilang imperyalistang kapangyarihan, kailangan nitong palawakin ang kanyang pagkukuhaan ng hilaw ng materyales, maiimpluwensyahan at malalagakan ng sobrang kapital.

Noon 2023 binuo ng Japan ang sariling plano na Free and Open Indo-Pacific para bigyang hugis ang pagpapalakas ng sariling presensyang militar at pagpapalawak ng impluwensya sa Asia. Pinirmahan nito kasama si Marcos ang tagibang na kasunduang militar sa pagitan ng Pilipinas at Japan na Reciprocal Access Agreement (RAA). Inendorso at sinuportahan ito ng Senado, kabilang ang maka-US na senador na si Risa Hontiveros ng Akbayan.

Pagpapatibay ng lakas pandigma ng Japan

Bahagi ng NSS ang pagbili at pagpapaunlad ng mga sistemang misayl para sa pagpapatibay ng depensa ng bansa. Sa tulak din ng US, binili ng Japan ang isang “pakete” ng mga misayl na nagkakahalaga ng $3.64 bilyon noong Enero 2025. Noong Nobyembre 2025 muling bumili ang Japan ng armas sa US, kabilang ang mga bomba at bala para sa eroplanong pandigma ng Japan Air Self-Defence Force sa halagang US$82 milyon.

Dahil sa tumatanda at lumiliit na populasyon, at kahirapan sa pagmantini ng malaking bilang ng tropa, itinuon ng gubyerno ng Japan ang pansin sa pagbubuo ng “unmanned weapons system” o armas na hindi kailangan ng tao. Para palakasin ang depensa sa tabing dagat, planong magbuo ng malaking bilang ng drones na panghimpapawid, at para sa ilalim at ibabaw ng karagatan para sa surbeylans at depensa. Ang sistema ay tinawag na SHIELD (Synchronized, Hybrid, Integrated and Enhanced Littoral Defence). Dagdag dito ang mas malalaking drone bilang panangga sa himpapawid o airspace, “standoff” missile at mga surface to ship missiles. Kaya ng mga misayl na ito na tumama hanggang sa layo na 1,000 kilometro.

Layon din ng gubyerno ng Japan na buhayin ang industriya sa depensa sa pamamagitan ng pinagsanib na mga proyekto at pagbebenta ng armas sa ibang bansa. Ngayon 2026, plano nito na maglaan 160 bilyon yen (US$1 bilyon) para magpaunlad ng “6th generation fighter jet” katuwang ang Britain at Italy sa ilalim ng Global Combat Air Programme. Kasama din sa mga proyekto ang mga drone na kontrolado ng artificial intelligence para lumipad kasabay ng mga jet.

Plano ng gubyerno ng Japan na palitawin ang pondo para sa depensa mula sa pagtaas ng buwis ng mga korporasyon at sa tabako, at pagtaas ng buwis sa sahod ng mga empleyado sa 2027.

Paglaban ng mamamayan sa Japan

Sa nagdaang mga buwan, naglunsad ng mga pagkilos ang mamamayang Japanese laban sa umiigting na militarismo ng kanilang gubyerno. Lumahok sa mga pagkilos na ito ang mga Pilipinong migrante sa ilalim ng Bagong Alyansang Makabayan (Bayan) at Migrante.

Nanawagan ang mga grupo sa lahat ng manggagawang Japanese, nagmamahal sa kapayapaan, at lahat ng migrante at imigrante sa Japan na magkaisa at labanan ang militaristang tunguhin ng gubyernong Japan. Anila, hindi dapat hayaan ang mga naghaharing uri na gamitin ang “nasyunalismo” para paghiwa-hiwalayin ang mamamayan.