Malukpanong gikundena sa mga grupo sa midya sulod ug gawas sa nasud, ingonman sa mga tawong-simbahan, akademiko ug mga grupong progresibo ang hukum nga sad-an silang Frenchie Mae Cumpio ug Marielle Domequil sa kasong “terror financing.” Gihukman ang duha niadtong Enero 22 og hangtud 18 ka tuig nga pagkapriso. Gipamulta usab sila og ₱500,000 kada usa.

Direktor si Cumpio sa independyenteng media outlet nga Eastern Vista ug kontribyutor sa Altermidya, samtang si Domequil, istap sa Rural Missionaries of the Philippines. Giaresto sila, uban ang tulo pa niadtong Pebrero 7, 2020. Kolektibo silang giila isip Tacloban 5.

Gikaurat sa daghan ang hukum, ilabina nga niadtong Oktubre 2025, gideklara sa Court of Appeals nga walay basihan ang pagkumpiska sa estado sa kwartang nakuha sa kang Cumpio. Matud sa korte, walay ligal o aktwal nga basihan aron masulting adunay kalambigitan ang kwarta sa Partido Komunista ng Pilipinas ug Bagong Hukbong Bayan. Samtang, abswelto usab silang Cumpio ug Domequil sa kasong illegal possession of firearms and explosives.

Gitawag sa mga midya ang hukum kang Cumpio ug Domequil nga “kapayasan sa hustisya” ug seryosong hulga sa kanhi nang makaluluoy nga kahimtang sa kagawasan sa pagpamahayag ug pagpadayag sa Pilipinas. Gimakmak nila ang paggamit sa estado sa balaod kontra-terorismo aron pahilumon ang mga midya ug uban pang tingog sa pagsupak. Gawas kang Cumpio ug Domequil, dili moubos sa 35 pa ka indibidwal ang gikasuhan og “terror financing” sukad 2021.

Nabalaka usab ang mga internasyunal nga organisasyon sa midya sa daw kinaunhang paghukum sa usa ka mamamahayag sa kasong “terror financing.” Dili moubos sa 14 ka langyawng embahada sa Pilipinas ang nanawagan nga agad nga buhian silang Cumpio ug Domequil.

Ayha ug sa mismong adlaw sa paghukum, naglunsad og protesta ang mga progresibong organisasyon sa Tacloban City ug Metro Manila. Niadtong Enero 22, gatusan ang nagtapok atubangan sa Commission on Human Rights aron babagan ang dili makatarunganong hukum ug iduso ang hinanaling pagpalingkawas sa Tacloban 5.