Gianunsyo sa Kilusang Bayan Kontra Kurakot (KBKK) niadtong Enero 19 nga subli kining maglunsad og malukpanong protestang kontra-korapsyon sa Pebrero 25, dungan sa pagdumdum sa ika-40 nga anibersaryo sa panag-alsang EDSA People Power. Ang grupo ang nanguna sa demonstrasyon nga gisalmutan sa 100,000 ka tawo niadtong Setyembre 21, 2025 ug 20,000 niadtong Nobyembre 30, 2025 batok sa korapsyon sa Luneta Park, Maynila.

Sa anunsyo sa KBKK, kauban niini ang lain-laing mga sektor ug grupo nga aktibong nagasalmot sa kalihukang kontra-korapsyon sa nasud. Lakip dinhi ang Bagong Alyansang Makabayan (Bayan), grupo ug konseho sa mga kabatan-onang estudyante nga nanguna sa dinagkung walkout niadtong ulahing bahin sa 2025, mga mamumuo ug kabus-sa-kasyudaran, kababayen-an, mga magtutudlo, mamumuong panglawas, tigulang ug uban pa.

Matud nila, taliwala sa makanunayong pagkundena sa mga grupo ug publiko sa rehimeng Marcos pipila pa lamang ang napanubag ug wala pay naprisong mga “big fish” o bigatin nga nalambigit sa korapsyon. Gimakmak usab nila ang pagratsada sa rehimen sa pagbalaod sa nasudnong badyet alang sa 2026 nga sa lintunganay puno pa gihapon sa pork barrel ug uban pang insertion. Dugang dinhi, dakung basihan usab sa ilang protesta ang pagbasura sa komite sa Kongreso sa reklamong impeachment batok kang Marcos.

Pagpangbusal ug pagpanumpo. Gikundena usab sa KBKK ang pagpangbusal ug pagpanumpo sa rehimeng Marcos sa mga nagkagrabeng kontra-korapsyon. Dili moubos sa 72 ka indibidwal ang gipasakahan og reklamo sa Philippine National Police (PNP) sa Department of Justice (DOJ) alang sa sedisyon ug pagpanulsol og sedisyon nga may kalabutan sa Anti-Cybercrime Prevention Act of 2012.

Lakip sa mga gireklamo sa PNP sa DOJ si Renato Reyes Jr, pangulo sa Bayan, ug mga lider-estudyante gikan sa mga konseho, mantalaan ug progresibong grupo nga silang Tiffany Faith Brillante, Joaquin Buenaflor, Jacob Baluyot, ug Aldrin Kitsune. Gitarget ang mga gireklamo tungod sa partisipasyon sa protestang Baha sa Luneta niadtong Setyembre 21, 2025 ug pag-post sa social media sa ilang mga baruganan nga kontra-korapsyon.

Naglunsad og mga protesta ang mga progresibong grupo batok sa pagpamig-ot sa PNP ug rehimeng Marcos. Nanawagan sila nga hinanaling ibasura ang mga reklamo. Giduso nila nga ang mga kurakot sa gubyerno ang angay gukdon ug prisohon, dili ang mga nagabatok sa korapsyon.