Hiluagan nga ginkundenar han mga grupo han mamamahayag ha sakob ngan gawas han nasud, sugadman han mga tawo ha singbahan, akademiko ngan mga progresibo nga grupo an desisyon nga salaan hira Frenchie Mae Cumpio ngan Marielle Domequil ha kaso nga “terror financing.” Ginsentensyahan an duha hadton Enero 22 han tubtub 18 katuig nga pagkapriso. Ginpamulta gihap hira han ₱500,000 kada usa.

Tagdumara hi Cumpio han independyente nga media outlet nga Eastern Visata ngan kontribyutor han Altermidya, samtang hi Domequil istap han Rural Missionaries of the Philippines. Gin-aresto hira, kaupod an tulo pa hadton Pebrero 7, 2020. Kolektibo hira nga ginkilala komo Tacloban 5.

Iginkatigda han damo an desisyon, labina nga hadton Oktubre 2025, igindeklara han Court of Appeals nga waray basaranan an pagkumpiska han estado ha kwarta nga nakuha kan Cumpio. Sigon ha korte, waray ligal o aktwal nga basaranan agud sumering nga mayda kalabutan an kwarta ha Partido Komunista ng Pilipinas ngan Bagong Hukbong Bayan. Samtang, abswelto naman hira Cumpio ngan Domequil ha bulag nga kaso nga illegal possession of firearms and explosives.

Gintawag han mga mamamahayag an desisyon kanda Cumpio ngan Domequil komo “kapakyasan han hustisya” ngan seryoso nga hulga ha daan na nga makuri nga kamutangan han kalibrihan ha pamamahayag ngan pagpapahayag ha Pilipinas. Ginsukna nira an paggamit han estado han balaud kontra-terorismo agud pamingawon an mga mamamahayag ngan iba pa nga tingog han pagtipa. Labot kanda Cumpio ngan Domequil, diri mamenos ha 35 pa nga indibidwal an ginkasuhan han “terror financing” tikang 2021.

Nababaraka gihap an mga internasyunal nga organisasyon han mamamahayag ha sering nira pinakasyahan nga pagdesisyon ha usa nga mamamahayag ha kaso han “terror financing.” Diri mamenos ha 14 nga langyaw nga embahada ha Pilipinas an nanawagan nga dagmit nga pagawason hira Cumpio ngan Domequil.

Antes ngan ha adlaw han pagdesisyon, naglansar han protesta an mga progresibo nga organisasyon ha Tacloban City ngan Metro Manila. Hadton Enero 22, gatus-gatos an nagtirok ha atubangan han Commission on Human Rights agud tipahan an diri makatadungan nga desisyon ngan ig-insister an dagmit nga pagpapagawas ha Tacloban 5.