Giila ug giparangalan sa rebolusyonaryong kalihukan sa Negros niadtong Pebrero si Reynaldo Erecre (Ka Amek) sa iyang bahandianong tampo sa pag-asdang sa rebolusyon sa Negros ug Central Visayas. Gipatay si Erecre sa pasistang mga sundalo sa 94th IB human siya madakpan niadtong Enero 30 sa Sityo Apitong, Barangay Bi-ao, Binalbagan, Negros Occidental.

Matud sa taho sa Bagong Hukbong Bayan (BHB)-South Central Negros (Romeo Nanta Command), wala nay ikasukol si Erecre dihang madakpan siya sa mga sundalo sa AFP. Tinuyo siyang gipatay gamit ang sobra-sobrang pwersa, hinungdan nga dili na maila ang iyang nawong.

Si Erecre ang kalihim sa Rehiyonal nga Komite sa Partido sa Negros dihang siya namartir. Naggikan siya sa hut-ong ubos nga petiburges ug midaku sa Maco, Davao de Oro. Nagtrabaho siya sa usa ka pabrika sa plywood human siya mihunong sa pag-eskwela sa kursong Bachelor of Science in Education.

Nagpultaym siya sa BHB niadtong 1996. Human sa tulo ka tuig sa serbisyo, nahimo siyang kagawad sa komite sa nataran. Nahimong kabahin siya sa yunit partisano sa BHB sa Cebu ug Bohol. Usa usab siya sa mga nanguna sa mapangahasong reyd sa hedkwarters sa PNP sa Bohol niadtong Hunyo 1999 kung asa nasakmit ang kapin 80 ka armas. Niadtong 2004, natuboy siyang upisyal sa Komiteng Tigpatuman sa Komiteng Rehiyon sa Central Visayas.

Niadtong 2006, gibalhin sa laing gimbuhaton si Erecre sa isla sa Negros ug nagsilbing kumander ug ikaduhang kalihim sa Partido sa nataran sa Southeast Negros. Sugod 2019, nahimong kumander si Erecre sa rehiyonal nga kumand sa BHB sa isla sa Negros (Apolinario Gatmaitan Command) ug nahimong kabahin sa Kalihiman sa Komiteng Rehiyon sa Partido sa tibuok isla. Sugod 2023, nagsilbi siyang kalihim sa Partido sa isla. Aktibo siyang nanguna ug nagpasiugda sa pagpaasdang sa kalihukang pagtul-id sa isla.

Namartir usab sa nahitabong engkwentro si Joem Golez. Usa siya ka istap sa gimbuhatong medikal sa rehiyonal nga kumand sa BHB. Naggikan siya sa hut-ong kabus nga mag-uuma ug residente sa Barangay Quintin Remo, Moises Padilla. Misampa si Golez sa hukbong bayan niadtong 2016.